कोरोना अपडेट

निषेधाज्ञाले नागरिकलाई गुजारा चलाउनै मुस्किल भएपछि खुकुलो बनायौं

मनोजकुमार देवकोटा बुधबार, भदौ २४, २०७७ २०:५५

काठमाडौं- कोरोना महामारीको समयमा कृषि तथा अन्य कामका लागि भारत पुग्नु भएका १ हजारभन्दा बढी नगरवासीहरु फर्कनु भयो। अन्य तेस्रो मुलुकबाट पनि फर्कनु भयो। उहाँहरुलाई हामीले छुट्टै क्वारेन्टाइनको व्यवस्थापन गरेर राखेका थियौँ। उहाँहरुमध्ये केहीमा कोरोना संक्रमण देखियो।

त्यसपछि विस्तारै क्वारेन्टाइनमा खटिनु भएका स्वास्थ्यकर्मी, सुरक्षाकर्मी, जनप्रतिनिधि, भान्सेलगायत व्यक्तिमा संक्रमण भयो। विस्तारै उहाँहरुको परिवारसम्म पनि कोरोना पुग्यो। यसरी कोरोना समुदायस्तरमा फैलियो। हाल नगरपालिकाको १५ वटै वडामा कोरोना फैलिसकेको छ।

हाम्रो नगरपालिका सर्लाहीको बढी प्रभावित क्षेत्र हो। नगरपालिकाभित्र १४ सय जनाको पिसिआर परीक्षण गराउँदा १ सय ४० जनामा कोरोना संक्रमण पुष्टि भएको थियो। तर पछिल्लो समय निको हुने क्रम बढ्दै गएको छ। बुधबारसम्म संक्रमित मध्ये ९२ जना निको भएर घर फर्किसक्नु भएको छ।

हाल सक्रिय संक्रमितहरू नगरपालिकाले तोकेका विभिन्न आइसोलेसनमा हुनुहुन्छ। उहाँहरु सबैको अवस्था सामान्य छ। स्वास्थ्य मन्त्रालयको निर्देशनअनुसार लक्षण नदेखिएका तथा अवस्था सामान्य रहेका कारण हामीले उहाँहरुलाई यही २६ गते डिस्चार्ज गर्दैछौँ।

संक्रमितको सम्पर्कमा आएकाहरुको कन्ट्याक्ट ट्रेसिङ गर्ने तथा पिसिआर परीक्षण गराउने क्रमलाई हामीले निरन्तरता दिइरहेका छौँ। पछिल्लो समय संक्रमण दर पनि घट्दै गएको छ। सुरुमा १ सय जनाको पिसिआर परीक्षण गर्दा १० जनामा कोरोना देखिन्थ्यो भने अहिले ५ जनाको हाराहारीमा देखिन थालेको छ।

कोरोना संक्रमण दर घटेसँगै हाम्रो नगरपालिकामा लागू गरेको निषेधाज्ञालाई पनि हामीले मंगलबारदेखि हटाएका छौँ। तर निषेधाज्ञा हटाएको भनेर पुरै खुल्ला भने होइन।

नगरबासीहरुलाई दैनिक गुजारा चलाउन समस्या भएपछि हामीले ब्यापार व्यवसाय तथा उद्योगधन्दाहरुका कामलाई केही खुकुलो बनाएका हौँ। सामाजिक दुरी कायम राख्दै व्यापार व्यवसाय खुल्ला गराएका छौँ। खेतीपाती तथा कृषि कामलाई निरन्तरता दिन सहजीकरण गरेका छौँ।

भिडभाड हुने स्थान, हाटबजार, मेला तथा जात्रा मनाउन भने दिएका छैनौँ। विद्यालय तथा कलेजहरु पनि बन्द छन्। यसरी हामी कोरोनासँग जुधिरहेका छौँ।

कोरोना महामारीसँग जुध्न सुरुमा हामीलाई निकै हम्मेहम्मे परेको थियो। अस्पतालको त कुरै छाडौँ। सुरुमा १५ बेड क्षमताको आइसोलेसन चाँहि बनाएका थियौँ। पछि बिरामी थपिँदै गएपछि हामीले त्यसलाई २५ बेडको बनायौँ। त्यसपछि ४० बेड र अहिले ६० बेडको बनायौँ। अहिले त त्यति अप्ठ्यारो परेको छैन।

केन्द्रबाट सहयोग नभए पनि नगरपालिकाले आफ्नो स्रोत साधनले भ्याएसम्म सक्दो पहल गरेको छ। औषधि, उपचार, आवश्यक स्वास्थ्य सामग्रीहरु, स्वास्थ्यकर्मीहरुको जोखिम भत्ता लगायतमा ठूलो धनराशी आफ्नै स्रोतबाट व्यवस्थापन गर्यौं।

प्रदेश सरकारले सुरुमा राहत वितरणका लागि भनेर १५ लाख रुपैयाँ दिएको थियो। त्यो राहतले त केही हुनेवाला थिएन। राहतका लागि हामीले आफ्नै स्रोतबाट ५० लाख रुपैयाँ थप्यौंं। विपन्न वर्गका लागि हामीले राहत वितरण गर्यौं।

कोरोना महामारीसँग जुध्न भनेर नगरले १ करोड छुट्याएका थियो। त्यसमा अन्य दातृ निकाय, गैरसरकारी संस्थाबाट समेत केही सहयोग आएकाले छुट्याएको बजेटको सीमा भित्रै रहेर काम गर्न केही सहज भयो।