काठमाडौं- पछिल्ला केही दिनयता नेपालमा कोरोना संक्रमणको तुलनामा संक्रमण मुक्त भई घर फर्कनेको सङ्ख्या बढेको छ। स्वास्थ्य तथा जनसङ्ख्या मन्त्रालयका अनुसार पछिल्ला तीन दिनदेखि संक्रमितको तुलनामा कोरोना मुक्त भई ‘डिस्चार्ज’ हुनेको सङ्ख्या बढ्दै गएको हो।
मन्त्रालयका अनुसार पछिल्लो २४ घन्टामा मुलुकभर ९०२ संक्रमित थपिँदा २ हजार २८७ जना कोरोना मुक्त भई घर फर्केका छन्। मंगलबारसम्म कुल सङ्क्रमितमध्ये ६८.५ प्रतिशत डिस्चार्ज भएका छन्।
सोमबार मुलुकभर ९ सय ७९ नयाँ सङ्क्रमित थपिँदा १ हजार ७३६ जना डिस्चार्ज भएका थिए। यस्तै आइतबार पनि सक्रिय संक्रमित (९८० जना) को तुलनामा झण्डै दोब्बर (१ हजार ८१४ जना) कोरोना जितेर घर फर्केका थिए।
हालसम्म कुल ३२ हजार ९ सय ६४ जना निको भएर घर फर्केका मन्त्रालयले जनाएको छ। सक्रिय संक्रमितको सङ्ख्या १४ हजार ८६८ रहेको छ। जसमध्ये ६ हजार ८१५ होम आइसोलेसनमा रहेका छन् भने आठ हजार ५३ संस्थागत आइसोलेनसमा छन्।
उपत्यकामा ३९६ सङ्क्रमित थपिए
पछिल्लो २४ घन्टामा काठमाडौँ उपत्यकामा मात्रै ३९६ नयाँ सङ्क्रमित थपिएका छन् । मन्त्रालयका अनुसार काठमाडौँमा ३००, भक्तपुरमा ५८ र ललितपुरमा ३८ सङ्क्रमित फेला परेका छन् । १० हजार ६११ नमूना परीक्षणमा देशभर ९०२ जनामा कोरोना सङ्क्रमण पाइएको मन्त्रालयका प्रवक्ता प्राडा जागेश्वर गौतमले जानकारी दिनुभयो ।
कैलालीमा ७७, मोरङमा ५१, सुनसरीमा ३८, धनुषामा ३३, कास्कीमा ३०, मकवानपुरमा २४, रुपन्देहीमा २१, चितवनमा २०, सप्तरी, सुर्खेत र गोरखामा १८/१८, झापामा १६, पर्सामा १४, ओखलढुङ्गामा १३, बारामा १२, वाग्लुङमा १०, कञ्चनपुरमा नौ, रौतहट, धादिङ र रामेछापमा आठ/आठ सङ्क्रमित फेला परेका छन् ।
बर्दिया र नवलपरासी पूर्वमा सात/सात, सर्लाहीमा ६, बाँकेमा ५, सिरहा र महोत्तरीमा ४/४, नुवाकोट, दाङ र तनहुँमा ३/३, उदयपुर, दोलखा र काभ्रेपलाञ्चोकमा २/२, इलाम, नवलपरासी, गुल्मी, कपिलवस्तु, अर्घाखाँची, स्याङ्जा, सिन्धुपाल्चोक, रोल्पा र दैलेखमा १/१ संक्रमित थपिएका छन्। मोरङ, सुनसरी, धनुषा, सर्लाही, काठमाडौं, ललितपुर, चितवन र रुपन्देहीमा ५०० बढी सक्रिय संक्रमित उपचाररत छन् भने ताप्लेजुङ, मनाङ, मुस्ताङ, डोल्पा, मुगु र हुम्लामा सक्रिय संक्रमित छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
