काठमाडौं- प्रधानमन्त्री केपी शर्मा ओलीले सरकार र निजी क्षेत्र मिलेर अघि बढ्नुपर्ने बताएका छन्। निजी प्रतिनिधिहरूसँग आइतबार साँझ बालुवाटारमा भएको छलफलमा प्रधानन्त्री ओलीले यस्तो धारणा राखेका हुन्।
'अर्थतन्त्र चलायमान बनाउन निजी क्षेत्र र सरकार मिलेर अघि बढ्नुपर्छ। छलफललाई मैले सकारात्मक रूपमा लिएको छु। यस्ता छलफल अझ पनि जारी राख्नुपर्छ,' प्रधानमन्त्री ओलीलाई उद्धृत गर्दै छलफलमा सहभागी भएका एक प्रतिनिधिले भने।
सरकार र निजी क्षेत्रले आपसी सहयोगलाई अझ बढाउनुपर्ने उनले बताएका थिए। सरकारसँग निजी क्षेत्रले गरेका सम्झौता पनि कार्यान्वयन उनले बताएका थिए।
छलफललाई प्रधानमन्त्री ओलीले सकारात्मक रुपमा लिएको र मिलेर अघि बढ्न आग्रह गरेको छलफलमा सहभागी उद्योग वाणिज्य महासंघकी अध्यक्ष भवानी राणाले बताइन्। 'अर्थतन्त्र चलायमान बनाउन निजी क्षेत्र र सरकार मिलेर अघि बढ्नुपर्ने बताउनु भएको छ,' उनले भनिन्, 'प्रधानमन्त्रीले छलफल फलदायी भएको बताउनुभयो।'
अर्थतन्त्र चलायमान बनाउने विषयमा छलफल भए पनि प्रधानमन्त्रीले निषेधाज्ञा र लकडाउनका विषयमा भने केही नबताएको छलफलमा सहभागी अर्का एक व्यवसायीले बताए।
छलफलमा महासंघका साथै नेपाल उद्योग परिसंघ र नेपाल चेम्बर अफ कमर्सका प्रतिनिधिहरुको पनि सहभागिता थियो। छलफलमा निवर्तमान अर्थमन्त्री डा युवराज खतिवडा पनि सहभागी थिए।
प्रधानमन्त्रीले बोलाएको सो छलफलमा निजी क्षेत्रका तर्फबाट महासंघले एक दर्जनभन्दा बढी सुझाव दिएको थियो। महासंघले बजेट मार्फत बढाइएको विद्युतीय गाडीमा बढाइएको भन्सार र अन्तशुल्क घटाउनु पर्ने सुझाव दिएका थिए।
आर्थिक वर्ष २०७७/०७८ को बजेटमार्फत शुक्रबारमा मात्रै अर्थमन्त्रीबाट राजीनामा दिएका डा युवराज खतिवडाले विद्युतीय गाडीको भन्सार र अन्तशुल्क बढाएका थिए। उनले राजीनामा दिएको २ दिनमै प्रधानमन्त्रीसँग भएको छलफलमा व्यवसायीले यस्तो माग गरेका थिए।
यसैगरी व्यवसायीले ईकमर्स अर्थात् प्रविधिको प्रयोगबाट हुने कारोबार र भुक्तानीलाई सहज बनाउन समेत प्रधानमन्त्रीलाई सुझाव दिए।
यसैगरी नयाँ उद्योग स्थापना गर्न चोहेको अवस्थमा अनुमति लिन निकै कठिन भइरहेका भन्दै वातावरणीय प्रभाव मूल्यांकनलगायतका विषय महिनौं लाग्ने अवस्था रहेको भन्दै १ वा बढीमा २ महिना भित्रै अनुमति दिने गरी सहज व्यवस्थाको नीतिगत सुधार गरिदिनसमेत माग गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
