सुरक्षा/अपराध

लागुऔषधको ओसारपसारमा वृद्धि

रासस आइतबार, भदौ २१, २०७७ १४:२९

फाइल तस्बिर

काठमाडौं- सिन्धुली जिल्लामा लागुऔषधको कारोबार हरेक वर्ष वृद्धि हुँदै आएको छ। पछिल्लो समय सदरमुकामदेखि ग्रामीण क्षेत्रमा समेत लागुऔषधको उत्पादन, विक्री वितरण र प्रयोग हुन थालेको छ। यसबाट विशेषगरी किशोरकिशोरी तथा विद्यालयका विद्यार्थीहरु बढी प्रभावित भएको बताइएको छ।

जिल्ला प्रहरी कार्यालय सिन्धुलीको चार वर्षको तथ्याङ्क हेर्ने हो भने पनि यस्को प्रयोगकर्ता तथा यसमा संलग्नको संख्या विस्तारै बढ्दै गरेको देखिन्छ। जिल्ला प्रहरी कार्यालय सिन्धुलीका प्रहरी नायब उपरीक्षक श्यामबहादुर खत्रीले लागूऔषध दुर्व्यसनी, व्यक्तिको मात्र नभई घरपरिवार, समाज र सिङ्गो राष्ट्रका लागि नै समस्या भएको बताए।

उनका अनुसार गाँजादेखि नाईट्राभेट ट्यावलेट, स्पास्मोप्रोक्सिभन क्याप्सुल, नाइट्रोसन ट्यावलेट, फेनार्ग एम्पुल, डाईजापा एम्पुल, नोफिन एम्पुलजस्त लागूऔषधको कारोबार हुने गरेको छ।

आर्थिक वर्ष २०७३/७४ मा लागूऔषधका पाँच, २०७४/७५ मा १२, २०७५/७६ मा १४ र २०७६/७७ मा १३ वटा मुद्दा दर्ता भएको थियो।

लागूपदार्थ दुर्व्यसनमा लागिसकेका व्यक्तिलाई उपचार तथा पुनर्स्थापना केन्द्रमा पठाउने र लागुपदार्थको कारोबारीलाई कानूनबमोजिम कारबाही गराइएको खत्रीले बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।