अहिले नगरमा सक्रिय कोरोना संक्रमित छैनन्। सक्रिय संक्रमितको कुरा गर्दा शून्य संक्रमित भएको नगरपालिका हुन सफल भएका छौं। कोरोना भाइरसको संक्रमण नेपालमा शुरु भएपछि नै नगरले सुरक्षित हुने उपाय खोजी गरेको थियो।
चैत ११ गते सरकारले देशभर लकडाउन घोषणा गर्यो। नगरले सोही समयदेखि विश्व स्वास्थ्य संगठन र नेपाल सरकारको स्वास्थ्य सुरक्षा मापदण्ड पालना गराएको थियो। भारत र तेस्रो देशबाट आउने मानिसहरुलाई समुदायमा प्रवेश नदिने नीति लिइयो। नगरले यसरी आउनेहरुलाई नगर प्रवेश गर्ने क्षेत्रमै रोक्ने र उनीहरुलाई क्वारेनटाइनमा राख्ने अनि परीक्षणपछि मात्र पठाउने गरियो।
यो क्षेत्रका धेरै मानिस रोजगारीका लागि भारत नगएकाले पनि पहिलो चरणमा धेरै संक्रमित फेला परेनन्। छिमेकी पालिकाहरूबाट धेरै मानिस भारत गएकाले फर्कदा एकैपटक धेरै संक्रमित भएका थिए। उनीहरुलाई क्वारेनटाइनमा व्यवस्थापन गर्नदेखि पिसिआर परीक्षणमा निकै समस्या भइरहेको थियो।
उनीहरुको यो अनुभव हाम्रा लागि पाठ बनेको छ। छिमेकी पालिकामा भएको समस्यामा आधारमा हामीले विस्तृत योजना बनायौं। उक्त योजनाअनुसार नगरका सबै वडाहरुले सूचना जारी गरे। जनतालाई कोरोनाबारेमा सचेत हुन र नयाँ मानिसहरुलाई परीक्षणपछि मात्र समाजमा पठाउने हाम्रो योजनाले काम गरेको छ।
समुदायमा पुगेन संक्रमण
नगरभित्र कुनै पनि समयमा हाहाकार हुने गरी संक्रमण हुन नदिन नगर सफल भएको छ। नगरभित्र हालसम्म १४ जनामा व्यक्तिमा संक्रमण पुष्टि भएको छ। उनीहरू ७ महिला र ७ पुरुष हुन्। अहिले नगरमा सक्रिय संक्रमितको संख्या शून्य छ। नगरले समुदायमा कोरोना पुगेको छ कि छैन भनी नमुना परीक्षण पनि गरेको थियो। नगरका शंकास्पद ५९० जनाको परीक्षण गरेको थियो।
स्वास्थ्य मापदण्ड पालना पूर्ण रुपमा गराइएको छ। उक्त परीक्षणपछि समुदायमा कोरोना संक्रमण गएको छैन भन्नेमा हामी ठुक्क भएका छौं। जोखिम अझै कायम छ।
नगरले राधिका उच्च मावि उर्लाबारीमा डेढ सय बेडको क्वारेनटाइन बनाएको छ। विद्यालयलाई मर्मत गर्दै सबै सुविधा पुग्ने गरी क्वारेन्टाइन सञ्चालन गरिएको थियो। अहिले पनि १६ जना मानिस क्वारेनटाइनमा रहेका छन्। अहिलेको तत्कालीन अवस्थामा कोरोना संक्रमितको संख्या शून्य भएपनि जोखिम भने अझै कायमै छ।
देशभर कोरोना संक्रमितको संख्या वृद्धि हुँदै गएकाले फेरि पनि संक्रमण नगरमा नहोला भन्न सकिँदैन। तर त्यसलाई रोक्न नगरले अहिले पालना गरेका सबै मापदण्डलाई निरन्तरता दिने छ। मास्क लगाउने ,सामाजिक दूरी पालना गर्नेजस्ता कार्यहरु जारी राख्नु पर्नेछ। यी उपायहरुको विकल्प नभएकाले नगरले पनि यसको पालना गराउने कार्य जारी राख्ने छ।
सचेत बसौं, मास्क लगाउऔं
सबै नगरवासीलाई मास्क अनिवार्य लगाउन आग्रह गर्दछु। मास्क नै संक्रमण रोक्न औषधि भएकाले घर बाहिर निस्कने बितिकै यसलाई लगाउन नबिर्सौं। सामाजिक दुरी कायम राख्न आफै सचेत हुने काममा हेलचक्राईं नगर्न नगरबासीलाई आग्रह गर्दछु। धेरै बाहिर अनावश्यक काममा नजाने, धेरै मानिसहरु जम्मा गरेर भोज भतेर नगर्ने ,विवाह लगायतका अन्य कार्यहरुमा सिमित व्यक्ति र सामाजिक दुरी कायम गरौँ। आफू र आफ्नो परिवारको स्वास्थ्यका लागि आफैं सचेत बनौं।
(फागो उर्लाबारी नगरपालिकाका मेयर हुन्।)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775205677.png)
-1764146706.png)
-1775122347.png)
