फाइल तस्बिर
चितवन- भरतपुरमा आइतबारदेखि कोभिड-१९ आइसोलेसन केन्द्र सञ्चालनमा आएको छ। भरतपुर महानगरपालिका-१ बागेश्वरीस्थित योगी नरहरिनाथ योग तथा प्राकृतिक चिकित्सालयमा ७५ शय्याको आइसोलेसन सञ्चालनमा आएको हो।
आइतबार आयोजित कार्यक्रममा भरतपुर महानगरपालिकाकी प्रमुख रेणु दाहालले आइसोलेसनको शुभारम्भ गर्दै कोरोना संक्रमण देखिएका पहिलो चरणका बिरामीलाई योग तथा प्राकृतिक चिकित्सा पद्धतिबाट उपचार गरिने बताइन्। उनले भनिन्, ‘भरतपुर महानगरपालिकाभित्रका संक्रमितहरुलाई पहिलो प्राथमिकतामा राखिने र आवश्यकताका आधारमा विस्तार गर्दै लगिने छ।’ प्रमुख दाहालले चितवनमा कोरोनाको संक्रमण बढ्दै गएकाले संक्रमितको व्यवस्थापनका लागि सबैले आआफ्नो क्षेत्रबाट सहयोग गर्नुपर्ने बताइन्।
भरतपुर महानगरपालिकाले प्राकृतिक चिकित्सालयसँग सहकार्य गरेर आइसोलेसन सञ्चालन गरेको हो। यहाँको मर्मतसम्भार, खाना खर्च सबै महानगरले व्यहोर्ने भएको छ। आन्तरिक व्यवस्थापनसँगै योग, ध्यान, आवश्यक उपचार चिकित्सालयले गर्नेछ भने अन्य प्राविधिक पक्षमा भरतपुर अस्पतालले सहयोग गर्नेछ। चिकित्सालयमा कोरोना संक्रमितका लागि छुट्टै ब्लक स्थापना गरिएको छ। सो ठाउँमा रहेका पाँच घरमा रहेका कोठाहरुलाई व्यवस्थित गरी आइसोलेसन बनाइएको छ।
चिकित्सालयका प्रमुख डा हेमराज कोइरालाले कोरोना संक्रमण भएका तर लक्षण नदेखिएकाहरुलाई प्राकृतिक विधिवाट उपचार गरिने बताए। उनका अनुसार आइसोलेसनमा बस्नेहरुलाई प्राकृतिक खानपान र नियमित योग, ध्यान र व्यायाम गराइनेछ भने मनोरन्जनको पनि विशेष ख्याल गरिनेछ। सामान्य लक्षण देखिएका पहिलो तहका बिरामीलाई सो आइसोलेसनमा राखिनेछ। आइसोलेसनमा १५ जना स्वास्थ्यकर्मी खटिनेछन्।
प्रदेशसभा सदस्य विजय सुवेदीले आइसोलेसन व्यस्थापनका लागि प्रदेश सरकारले पनि सहयोग गर्ने बताउँदै जिल्लामा यस्ता आइसोलेसन केन्द्रहरु अन्यत्र पनि स्थापना गर्न पहल शुरु गरिएको जानकारी दिए। सो अवसरमा प्रतिनिधिसभा सदस्य कृष्णभक्त पोखरेल, प्रदेश सांसद विजय सुवेदी, घनश्याम दाहाल, प्रमुख जिल्ला अधिकारी नारायणप्रसाद भट्टराई, भरतपुर महानगरपालिकाकी उपप्रमुख पार्वती शाह ठकुरीलगायतको उपस्थिति थियो।
पूर्वी चितवनका चार नगरपालिकाले रत्ननगर र माडीले वडा नं ५ मा आइसोलेसन बनाइसकेको छ। दोस्रो र तेस्रो तहका संक्रमितलाई भने भरतपुर अस्पताल र दुई मेडिकल कलेजमा उपचार गरिने व्यवस्था मिलाइएको छ। चितवनमा आजसम्म सङ्क्रमितको सङ्ख्या ६२६ पुगेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
