काठमाडौं–सरकारले गत साउन ५ गते करिब ४ महिना लामो लकडाउन खोल्ने निर्णय गर्यो। लकडाउनका कारण कोरोना संक्रमण नियन्त्रणमा रहेको दाबी सरकारका प्रवक्ता युवराज खतिवडाले गरेका थिए। लकडाउन खोल्ने निर्णय भएको दिन काठमाडौं उपत्यकामा तीन जना संक्रमित थपिएका थिए।
त्यसदिनदेखि भदौ १२ गते शुक्रबारसम्मको तथ्यांक हेर्दा हरेक दिन कोरोना संक्रमणले नयाँ रेकर्ड बनाएको देखिएको छ। अब यी रेकर्डहरु विस्तारै चरम बिन्दूमा पुग्ने जनस्वास्थ्यविद् र संक्रामक रोगका जानकारहरु बताउँछन्।
लकडाउन खोलेको केही हप्ता दोहोरो अंकमा रहेको संक्रमण अहिले ४ सयमाथिको ग्राफमा उक्लिएको छ। मृत्यु हुनेको संख्या पनि दिनहुँ बढिरहेको छ। काठमाडौंका धेरै क्षेत्र कोरोना हटस्पट बनेका छन्। चावहिल, जोरपाटी, चाँगुनारायण, मैतिदेवी, कालिमाटी, कुलेश्वर, बानेश्वरलगायतका क्षेत्र अहिले कोरोना हटस्पटका रुपमा रहेका छन्।
काठमाडौंमा लक्षणसहितका संक्रमितसमेत छन्। उपत्यकाका अस्पतालहरु संक्रमितले भरिएकाले अधिकांश नगर र वडाहरुले होम आइसोलेनमा राख्न थालेका छन्। काठमाडौं उपत्यकाका ७० प्रतिशतभन्दा धेरै संक्रमित अहिले होम आइसोलेनमा रहन थालेका छन्।
लकडाउन खुलेको पहिलो हप्ता
लकडाउन खुलेको पहिलो हप्ता काठमाडौ उपत्यकामा संक्रमितको संख्या अधिकतम ५१ सम्म पुगेको थियो। ५ साउनमा ३ जना संक्रमित थपिएको उपत्यकामा ८ गते ९ जना थपिए। १० गते तीन जना थपिए। यो संख्यामा एक्कासी वृद्धि भएर १३ गते ५३ जना पुगे। यसरी थपिनेमा नाकामा स्वाब दिएका धेरै व्यक्ति थिए। थानकोट र साँगा नाकाबाट काठमाडौं छिरेका यात्रुहरुको नमुना स्वाब संकलन गरिएको थियो। त्यसको परीक्षण रिपोर्ट आउँदा उपत्यकामा संक्रमण थपियो। १४ साउनमा उक्त संख्या १४ मा मात्र सीमित भयो। १५ गते ४५ जना संक्रमित उपत्यकामा थपिए। १७गते ६ जना र १८ गते ३१ जना संक्रमित उपत्यकामा फेला परेका थिए।
दोस्रो हप्तादेखि सय नाघ्यो
साउन १९ गतेदेखि कोरोना संक्रमणको ग्राफ ह्वात्तै वृद्धि भयो। १९ गते ५१जना थपिए। त्यसपछि हरेक दिन सयको हाराहारीमा संक्रमित थपिन थाले। अघिल्लो हप्ता दिन बिराएर थपिएका संक्रमितको ग्राफ त्यसपछि सयको गतिले उकालो लाग्न थाल्यो। २० साउनमा ८०जना संक्रमित थपिए। २१ गते उक्त संख्या १०२ पुग्यो। २६ गतेसम्म केही कमि भयो।
२७ गतेदेखि उक्त आँकडामा फेरि वृद्धि भयो। २७ गते उपत्यकामा १३४ जना संक्रमित फेला परेका थिए। साउन महिनाको अन्तिम दिन करिब दुई सयको नजिक पुग्यो। २७ गते १७२ जना नयाँ संक्रमित थपिएको पुष्टि स्वास्थ्य तथा जनसंख्या मन्त्रालयले गर्यो।
भदौदेखि झन् उकालो
भदौ १ गतेदेखि काठमाडौ उपत्यकाको कोरोना ग्राफ झन् उकालो चढेको देखिन्छ। १ गते १६८ जनामा कोरोना संक्रमण पुष्टि भएको थियो भने २ गते यो संख्या २ सय नाघ्यो। यसरी वृद्धि हुनेक्रम १० गतेदेखि ३ सयको संख्यामा पुगेको छ। १० भदौमा उपत्यकामा ३०१ जना थपिएका थिए भने ११ गते ३७७ जना र १२ गते ४१५ जना थपिए।
योसँगै साउन ५ गते पछि काठमाडौमा ४३ सय १७ जना संक्रमित थपिएका छन् । यसरी थपिनेमा काठमाडौका ३५सय६३, ललितपुरका ५२८ र भक्तपुरका ३४८ जना रहेका छन्। हालसम्म काठमाडौं उपत्यकामा ३८सय ५ जना संक्रमित पुष्टि भएका छन्। ललितपुरमा ५सय८७ र भक्तपुरमा ४ सय १९ जना संक्रमित रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
