काठमाडौं- बागमती प्रदेशका सामाजिक विकासमन्त्री युवराज दुलालले २४ घन्टाभित्र कोरोना परिक्षणको रिर्पोट आउने व्यवस्था मिलाउन लागिएको बताए। प्रदेशको सहयोगमा धुलिखेलमा स्थापना भएको ल्याब अनुगमन गर्दै मन्त्री दुलालले यस्तो बताएका हुन्। कोरोना परीक्षणको रिर्पोट ढिलो आउँदा केस अध्ययन र कन्ट्याक्ट ट्रेसिङमा समस्या भएको मन्त्री दुलालले बताए।
‘रिर्पोट ढिला हुँदा कोरोना नियन्त्रण र उपचारमा चुनौति थपिएकाले बागमती प्रदेश सरकारको ध्यान अहिले संकलित नमूनाको २४ घण्टाभित्र कसरी रिपोर्ट दिन सकिन्छ भनेर प्रयोगशालाहरुको अवस्था बुझिरहेको छ’ उनले भने‚ ‘पिसिआर परीक्षण ल्याब थप सञ्चालन गर्नैपर्ने बाध्यता देखिएको छ।’
मन्त्री दुलालका अनुसार बागमती प्रदेशमा हाल २२ वटा पिसिआर ल्याबबाट कोभिड १९ को परीक्षण भइरहेको छ। केही दिनभित्र भक्तपुर, सिन्धुली, नुवाकोट र हेटौंडामा थप नयाँ पिसिआर ल्याब सञ्चालनमा आउने उनले बताए। कोभिड- १९ को परीक्षण र रोकथाममा सुरुदेखि नै बागमती प्रदेश सरकार र धुलिखेल अस्पतालबीच आवश्यक समन्वय र सहकार्य हुँदै आएको र अब परीक्षण र उपचारको क्षमता बढाएर जाने समेत मन्त्रीले जानकारी गराए।
धुलिखेल अस्पतालको प्रयोगशालाको स्थलगत अवलोकनसहित कार्यसम्पादनको अवस्था र चुनौति आदिका बारेमा माइक्रोबायोलोजी टिमसँग छलफल गरिएको थियो। ‘थोरै जनशक्तिबाट कसरी धेरै कार्य गर्न सकिन्छ भन्ने एउटा उदाहरण धुलिखेल अस्पतालले दिएको छ’ उनले भने‚ ‘यस बाहेक धुलिखेल अस्पतालमा अटोमेटिक आरएनए एक्सट्राक्सन मेसिन सञ्चालनमा आउँदैछ।’
धुलिखेल अस्पतालको प्रयोगशालामा दुई र प्रदेश प्रयोगशालामा एक गरी तीनवटा पिसिआर ल्याबबाट दैनिक १५ सयदेखि १८ सयसम्म स्वाब परीक्षण हुने मन्त्री दुलालले बताए
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
