काठमाडौं-काठमाडौं उपत्यकामा पछिल्लो एक महिनामा ४ हजारभन्दा बढी कोरोना संक्रमित थपिएका छन्। साउन ७ गतेपछि लकडाउन खोलेपछि काठमाडौंमा संक्रमितको संख्या ह्वात्तै बढेको हो।
साउन ७ गतेसम्म उपत्यकामा संक्रमितको संख्या जम्मा ३८२ मात्र थियो। नेपालमा कोरोना संक्रमित देखिएको ७ महिनासम्मको अवधिमा उपत्यकामा ३८२ संक्रमित रहेकोमा बिहीबार एकै दिन ३७७ जना थपिएका छन्।
सरकारले साउन ७ गते कुनै तयारी नै नगरी हतारमा एकैपटक लकडाउन अन्त्य गरेका कारण उपत्यकामा संक्रमितको संख्या बढेको विज्ञहरुले बताएका छन्।
लकडाउन अन्त्य गर्नुअघि जनस्वास्थ्यका मापदण्डको कार्यान्वयन, जोखिममको अवस्था, मानिसको आवतजावतको अवस्था लगायतका सबै कुराको विषय हेरेर गर्नुपर्नेमा एकैपटक कोरोना सकिएझैं गर्दा समस्या भएको विज्ञहरुको भनाइ छ।
स्वास्थ्य तथा जनसंख्या मन्त्रालयका अनुसार काठमाडौं उपत्यकाका तीन जिल्लामा सबैभन्दा बढी संक्रमित काठमाडौं जिल्लामा छन्। काठमाडौंमा बिहीबार साँझसम्ममा ३ हजार ४५७ जनामा कोरोना संक्रमण देखिएको छ। संक्रमण देखिएकामध्ये १८ जनाको मृत्यु भएको छ भने ३४६ जना निको भएका छन्। काठमाडौंमा ३ हजार ९३ जना सक्रिय संक्रमित छन्।
यस्तै ललितपुरमा ५७५ जनामा कोरोना देखिएको छ। संक्रमण देखिएकामध्ये ३ जनाको मृत्यु भएको छ भने ५५ जना निको भएका छन्। ललितपुरमा ५१७ जना सक्रिय संक्रमित छन्।
भक्तपुरमा ३६६ जनामा कोरोना संक्रमण देखिएको छ। संक्रमण देखिएकामध्ये ३ जनाको मृत्यु भएको छ भने ४६ जना निको भएका छन्। भक्तपुरमा ३१७ जना सक्रिय संक्रमित छन्।
उपत्यकामा साउन ७ गतेदेखि भदौ ११ गतेसम्मको अवधिमा सबैभन्दा बढी ११ गते एकै दिन ३७७ जनामा कोरोना संक्रमण देखिएको छ। भदौ १० गते ३०१ जनामा संक्रमण देखिएको थियो।
भदौ ९ गते २३२, भदौ ८ गते २२४, भदौ ७ गते १६६, भदौ ६ गते २१६, भदौ ५ गते १८२, भदौ ४ गते २००, भदौ ३ गते १५९, भदौ २ गते २०५, भदौ १ गते १६८ जनालाई संक्रमण देखिएको छ।
लकडाउन खुलेको दिन साउन ७ गते जम्मा ३ जनालाई मात्र संक्रमण देखिएको थियो। साउन ८ गते ९, साउन ९ गते १०, साउन १० गते ३, साउन ११ गते ८, साउन १२ गते ६, साउन १३ गते ५३, साउन १४ गते १५, साउन १५ गते ४८, साउन १६ गते ३८ जनालाई संक्रमण देखिएको थियो।
बिहीबारसम्म उपत्यकाका तीनवटै जिल्लामा गरी संक्रमितको संख्या ४३९६ पुगेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
