भक्तपुर–भक्तपुरको मध्यपुर थिमिमा कोरोना संक्रमित एक महिलाको मृत्यु भएको छ। मध्यपुरथिमि नगरपालिका–३ गठ्ठाघरस्थित नागरिक सामुदायिक अस्पतालमा उपचारका लागि ल्याइएकी ६२ वर्षीया एक महिलाको गएराति मृत्यु भएको प्रमुख जिल्ला अधिकारी हुमकला पाण्डेले जानकारी दिइन्।
उच्च रक्तचापको बिरामी रहेकी महिलामा कोरोना संक्रमण पुष्टि भएको बताउँदै उनले आज वीर दल गण सूर्यविनायकको टोलीले शवको व्यवस्थापन गर्ने जानकारी दिइन्। आजै मृतकका परिवारको कन्ट्याक्ट ट्रेसिङ गरी स्वाब सङ्कलन गरी पिसीआर परीक्षण गरिने उनले जानकारी दिइन्।
अस्पतालका निर्देशक जितेन्द्र श्रेष्ठले दम, उच्च रक्तचापलगायत समस्याका कारण उपचारका लागि नागरिक अस्पताल ल्याइएकी महिलाको अस्पताल ल्याउँदा मृत्यु भइसकेको बताए।
‘बिरामीलाई अस्पताल ल्याएर उपचार सुरु गर्दा नै मृत्यु भइसकेको थियो। हाम्रा डाक्टरले परिवारसँग बुझ्दा पाँचदिनदेखि ज्वरो आएको, बान्ता भएको, उच्च रक्तचापको औषधि सेवन गरिरहेको, घरमै बेहोस भएपछि अस्पताल ल्याएको जानकारी गराएपछि राति नै पिसीआर परीक्षणका लागि स्वाब पठाउँदा कोरोना सङ्क्रमण पुष्टि भयो,’ उनले भने।
महिलाको मृत्युपछि अस्पतालको आकस्मिक र ओपिडी आज र शनिबार दुई दिनका लागि बन्द गरिएको उनले जानकारी दिए। बिरामीसँग सम्पर्कमा आएका अस्पतालका चिकित्सक र नर्सलाई क्वान्टाइनमा राख्ने र अस्पताललाई भाइरस निर्मलिकरण गरेर आइतबारदेखि मात्रै सञ्चालन गर्ने निर्देशक श्रेष्ठले जानकारी दिए।
भक्तपुरमा यसअघि कोरोना संक्रमित २ जनाको मृत्यु भइसकेको छ। अहिलेसम्म भक्तपुरमा ३७५ जनामा कोरोना संक्रमण भएको छ भने मध्यपुरथिमि नगरपालिकमा समुदायस्तरमै भाइरस फैलिएको पाइएको छ। अहिलेसम्म सबभन्दा बढी मध्यपुरथिमि नगरपालिकामा १५६, भक्तपुर नगरपालिकामा ६२ जना, सूर्यविनायक नगरपालिकामा ९४ जना र चाँगुनारायण नगरपालिकामा स्थानीय १९ जना र शसस्त्र प्रहरी गण दुवाकोटका २० शसस्त्र प्रहरीसहित ३९ मा संक्रमण छ।
भक्तपुरमा समुदायस्तरमै कोरोना संक्रमण फैलँदै गएको र मृतकको संख्यासमेत बढ्दै गएको भन्दै प्रत्येक नगरपालिकाले प्रत्येक घरको कम्तीमा एकजनाको पिसीआर गर्नुपर्ने स्थानीयले माग गरेका छन्। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
