काठमाडौं- काठमाडौं जिल्लामा पर्ने नागार्जुन नगरपालिकाले ५ सय बेडको आइसोलेसन केन्द्र बनाउने तयारी थालेको छ। नगरपालिकाकी उपमेयर सुशीला अधिकारील संघीय सरकारसमेतको सहयोगमा नगरपालिकाले ५ सय बेडको आइसोलेसन सेन्टर बनाउने तयारी थालेको जानकारी दिएकी हुन्।उपत्यकाको अधिकांश स्थानमा कोरोना फैलिसकेकाले सबै स्थानीय तहले आइसोलेसन सेन्टर निर्माणको कामलाई तीव्रता दिएसँगै नागार्जुनले पनि ५ सय बेड तयारी गर्न लागेको हो।
संक्रमितको संख्या बढ्दै गएपछि अस्पतालमा बेड अभाव हुन थालेपछि संक्रिमतलाई होम आइसोलेसनमा राख्न थालिएको छ। लक्षण देखिएका, घरमा आइसोलेसनमा बस्न सम्भव नभएका तथा जटिल अबस्थाका संक्रमितहरु मात्रै अस्पतालाको आइसोलेसनमा छन्।
‘हामीले सुरुवाती चरणमै यही अवस्थालाई मध्यनजर गरेर ९ बेडको आइसोलेसन र ३० बेडको क्वारेन्टाइन बनाएका थियौं। अहिले क्वारेन्टाइनलाई आइसोलेसनमा परिणत गर्नुपर्छ भनेर हामीले तयारी गरेका छौँ,’ उपमेयर अधिकालेले भनिन्, ‘त्यस्तै गरेर हाम्रो नागार्जुन नगरपालिकामा एउटा सहरी विकासको भवन छ। त्यो भवनमा ५ सय बेडको आइसोलेसन स्थापना गर्न सकिन्छ। केन्द्र सरकार, स्वास्थ्य मन्त्रालय, नगरपालिका सबै मिलेर ५ सय बेडेको आइसोलेसन बनाउने तयारी भइरहेको छ।’
नगरमा हाल विभिन्न स्थानका २० जना संक्रमितलाई आइसोलेसन सेन्टरमा राखिसकिएको छ।
कस्तो छ अवस्था?
पहिलो चरणको लकडाउन खुकुलो बनाएपछि प्रभावित स्थानबाट आएका मानिसहरुबाट फैलिएको कोरोना समुदायमा पुगिसकेको नगरपालिकाले जनाएको छ। नगरपालिकाको सबैजसो वडामा कोरोना संक्रमित भेटिइसकेका छन्।
नगरपालिकाको सितापाइला क्षेत्रमा धेरै संक्रमित भेटिएको नगरपालिकाकी उपमेयर अधिकारीले बताइन्। बिहीबारसम्म नगरपलिकामा ५७ जनामा कोरोना पुष्टि भइसकेको छ। १ जना संक्रमितको ज्यान गएको नगरपालिकाले जनाएको छ। ३ जना नगरपालिकाको सम्पर्कमा आउन सकेका छैनन्। संक्रमितमध्ये ६ जना कोरोना संक्रमणमुक्त भएर घर फर्किएका छन् भने बाँकी संक्रमितहरु विभिन्न अस्पताल र होम आइसोलेसनमा राखिएको छ।
१८ संक्रमित होम आइसोलेसनमा
हाल नगरपालिकाका १८ जना संक्रमित होम आइसोलेसनमा रहेको नगरपालिकाले जानकारी दिएको छ। ‘लक्षण नदेखिएका तथा अवस्था सामान्य भएका संक्रमितहरु होम आइसोलेसनमा हुनुहुन्छ। किड्नीका एक जना बिरामीको अवस्था अलि गम्भीर छ। अरुको अवस्था सामान्य नै छ। होम आइसोलेसनमा बस्नेहरु स्वास्थ्यकर्मीहरुको निगरानीमा हुनुहुन्छ,’ उपमेयर अधिकारीले भनिन्।
होम आइसोलेसनमा रहँदा अप्ठ्यारो भयो भने तुरुन्त अस्पताल पुर्याउने व्यवस्था मिलाइएको उनको भनाइ छ।
कोरोना नियन्त्रणका लागि ३ करोड बजेट
विपद् व्यवस्थापनलगायत अन्य स्रोतबाट रकम जुटाएर नगरपलिकाले कोरोना रोकथाम तथा नियन्त्रणका लागि पहल गरेको जनाएको छ। त्यस्तै नगरपालिकाको आन्तरिक स्रोतबाट कोरोना नियन्त्रणका लागि ३ करोड छुट्याएको उपमेयर अधिकारीको भनाइ छ। ‘हामी हाम्रो स्रोतसाधनले भ्याएसम्म काम गरिरहेका छौँ। अहिलेसम्म चाहिँ बजेट अभाव भएको छैन,’ उनले भनिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
