कोरोना अपडेट

‘स्वाब दिएर भोज गर्दा टोलभर त्रास फैलियो, सचेतताको अभाव छ’

कृष्णहरि थापा बिहीबार, भदौ ११, २०७७ २०:२२

देशका अधिकांश स्थानमा कोरोना संक्रमित दैनिक रूपमा बढिरहेका छन्। सबै स्थानीय सरकारले छुट्टै आइसोलेन बनाउनुपर्ने अवस्था भइरहेको छ। कागेश्वरी मनोहरा नगरपालिकाले अहिलेसम्म मूलपानीको स्वास्थ्य चौकीमा संक्रमितलाई आइसोलेसनमा राखेको छ। अब यसले धान्ने अवस्था देखिँदैन।

विस्तारै संक्रमतिको संख्या बढिरहेकाले यसतर्फ केन्द्रित भएर प्रदेशसँग अलग्गै आइसोलेसन बनाउनका लागि कुराकानी भइरहेको छ। नगरले परीक्षणको दायरा बढाउन जोड गरिरहेको छ। काठमाडौ उपत्यकामा दिनदिनै संक्रमित बढिरहेकाले यसको प्रभाव हाम्रो नगरमा पनि पर्ने देखिन्छ। हाल (बिहीबार बिहानसम्मको तथ्यांक अनुसार) नगरमा १०३ जना संक्रमित रहेका छन्। १० जना निको भएर घर फर्केका छन्। मूलपानीमा सञ्चालनमा रहेको आइसोलेसन भरिएकाले अहिले होम आइसोलेनमा राख्न थालेका छौँ। संक्रमितहरुमा कुनै पनि लक्षण नभएकाले हालसम्म धेरै समस्या भएको छैन। लक्षण भएका बिरामी आइहालेमा केही बेड मूलपानी आइसोलेनमा जगेडा राखिएको छ।

सैलुनबाट फैलियो कोरोना
शुरुमा उक्त क्षेत्रमा एकजना सैलुन सञ्चालकमा कोरोना संक्रमण देखिएको थियो। तराईतिरबाट आएका सैलुन सञ्चालक परीक्षण नगरी बस्दा समुदायमा फैलिएको आशंका नगरपालिकाले गरेको छ।

उक्त सैलुनमा धेरै मानिस कपाल काट्न गएको र सैलुन सञ्चालकसहित समुदायका अन्य मानिसमा पनि देखिएपछि उक्त क्षेत्र सिल गरिएको मेयर थापाले बताए। उनका अनुसार ९ नं वडामा पर्ने खहरे चोकदेखि वीरेन्द्र चोकसम्म सिल गरिएको छ। वडा नं ९ मा मात्रै ४८ जनामा कोरोना देखिएको छ।

कोरोना भाइरस संक्रमित बढी देखिएपछि काठमाडौं महानगर-३२ को सिमाना खहरेचोकदेखि गान्धी स्कुल हुँदै वीरेन्द्रचोक (जगतजंग मार्ग)सम्म आउजाउ निषेध गरिएको छ। उनीहरुको परीक्षण रिर्पोट आएपछि विस्तारै उक्त क्षेत्र खुल्ला गरिन्छ।

स्वाब दिएर भोज गर्दा टोलभर त्रास
नागरिकहरु सचेत नहुँदा नगरभर त्रास भएको छ। संक्रमण कसरी फैलन्छ भन्ने कुरामा मानिसहरुले ख्याल नर्गदा संक्रमण धेरै फैलिएको अनुमान हामीले गरेका छौं। मास्क लगाउने, सामाजिक दुरी पालना गर्ने र अन्य मानिसँग घुलमिल नहुने कुरा ख्याल गर्न मानिसले सकेका छैनन्। यहाँ मुख्य रुपमा दुईवटा घटनाले त्रास सिर्जना गरेको छ। दर खान सामूहिक भोज गर्दा र सैलुनमा कपाल काट्ने धेरै मानिस जाँदा संक्रमण समुदायमा पुगेको छ।

कागेश्वरी मनोहरा सयपत्री टोलकी ३० वर्षीया महिला सामान्य ज्वरो र हल्का खोकी लागेपछि भदौ १ गते मूलपानीस्थित स्वास्थ्य केन्द्रमा स्वाब दिएर फर्किएपछि घरमा भोज गर्दा केही समय उक्त टोलभर त्रास फैलिएको थियो। स्थानीय सहकारी सञ्चालक भएकीले तीजको अवसरमा ३० जना महिला घरमै डाँकेर सामूहिक दर खुवाएकी थिइन्। अन्य समयझैं सम्झेर उनले भोज खुवाउँदा भोज खानेहरूका परिवार र उनीहरूको सम्पर्कमा आएका सबै त्रसित थिए। स्वाव दिएर आएपछि उनका कुनै लक्षण थिएन तर भदौ ४ गते आफ्नै घरमा धुमधामका साथ तीजको दर खाने कार्यक्रम सकेपछि ५ गते पोजेटिभ आयो। जसले गर्दा गाउँ नै सिल गर्न पर्‍यो।

सहकारीमा काम गर्ने भएकोले सोही सम्बन्धलाई विस्तार गर्न उनले भोज आयोजना गरेपछि त्यसको असर टोलभर पर्‍यो। ३० भन्दा बढी महिला दर खाने कार्यक्रममा सहभागी भएका उनीहरुलाई परीक्षणमा आउन र उनीहरुको सम्पर्कमा पुगेका व्यक्तिलाई क्वारेनटाइनमा राखियो। यसरी उनी एकजनाको पोजेटिभ आएपछि वडादेखि नगरसम्म त्रास पैदा भयो।

उनको सम्पर्क खोज्दै जाने क्रममा परिवारका ५ जना पिसिआर परीक्षणको लागि भन्दै मूलपानी स्वास्थ्य केन्द्र पुगेका थिए। उनको परिवारमा छोरालाई कोरोना संक्रमण पुष्टि भयो। परिवारका अन्य सदस्यमा देखिएको छैन। तर ३० जनालाई भोज दिएको भएपनि रिपोर्ट आएका केहीमा संक्रमण देखिएको छैन।अन्यको रिपोर्ट आउन बाँकी छ।

परीक्षणको दायर विस्तार
नगरपालिकाले कोरोना परीक्षण दायर बढाएको बताएको छ। वडा नम्बर ६ मूलपानीस्थित नगर अस्पतालमा नगरवासीको कोरोना परीक्षण गर्दै आएको छ। नगरवासीको वैशाख १ देखि कोरोना परीक्षण थालिएको थियो।

भदौ ५ सम्म नगरमा २ हजार ४ सय १४ जनाको पिसिआर १ हजार ३ सय ४४ जनाको आरडिटी परीक्षण गरिएको नगरप्रमुख थापाले जानकारी दिए।नगरप्रमुख थापाका अनुसार १ हजार ६ सय ९१ पुरुष र ७ सय २२ महिलाको पिसिआर गरिएको छ।