कोरोना संक्रमण दिनप्रतिदिन बढ्दो छ। टोखा नगरपालिकाको वडा नम्बर २ बाहेक अन्य सबै वडामा कोरोना संक्रमित भेटिइसकेका छन्। २ नम्बर वडामा चाहिँ कोरोना संक्रमणसँग मिल्दोजुल्दो लक्षण देखिएका वा संक्रमितको सम्पर्कमा आएका व्यक्ति नभएकाले पनि त्यहाँ पिसीआर परीक्षण पनि गरिएको छैन। परीक्षण नभएकाले पनि कोरोना संक्रमित नदेखिएको हुन सक्छ।
अन्य वडाका तुलनामा वडा नम्बर १० र ५ मा बढी संक्रमित भेटिएका छन्। हाल नगरपालिकाले दैनिक सय जनाको पिसीआर गराउँदै आएको छ। जसमा पनि ४/५ जनामा पिसीआर पोजिटिभ आउन थालेको छ। मंगलबारसम्म नगरपालिकाभरमा १२० जनामा कोरोना पुष्टि भएको छ। कोरोना संक्रमण देखिएका अधिकांश स्वास्थ्यकर्मी, बैंकका कर्मचारी, व्यापारी लगायत बढी जनसम्पर्कमा आउने व्यक्तिहरु र प्रभावित जिल्लाबाट आएका व्यक्तिहरु छन्। पछिल्लो समय उनीहरुको सम्पर्कमा आएका व्यक्ति तथा परिवारमा कोरोना देखिन थालेको छ।
विभिन्न स्थानमा काम गर्ने मानिसमा संक्रमण देखिएपछि समुदायमा कोरोना फैलिएको छ। हालसम्म हाम्रो नगरपालिकाका २ जना कोरोना संक्रमितको ज्यान गएको छ। मृतकहरु एकजना क्यान्सरका बिरामी र एकजना सुत्केरी महिला हुन्। क्यान्सर पीडितको मृत्यु भइसकेपछि कोरोना पुष्टि भएको थियो।
कोरोना संक्रमितमध्ये पनि ४५ जना कोरोना जितेर घर फर्किसक्नुभएको छ। बाँकी संक्रमितहरु केही होम आइसोलेसनमा हुनुहुन्छ। उहाँहरु आफ्नै खुसीले होम आइसोलेसनमा बस्नु भएको छ। होम आइसोलेसनमा बस्नेलाई हरेक दिन प्रतिव्यक्ति ३ सय ५० का दरले सन्तुलित भोजनका लागि उपलब्ध गराएका छौँ। यो घोषणा गर्ने हामी नै पहिलो स्थानीय तह हौँ। उहाँहरुसँग हाम्रो नगरपालिकाको स्वास्थ्य टिमको सम्पर्कमा छ। म आफैँ पनि हरेक दिनजसो उहाँहरुको सम्पर्कमा छु। केही अप्ठ्यारो पर्यो भने तत्काल खबर गर्न भनेका छौँ।
अस्पतालको आइसोलेसनमा भएकामध्ये एक जनाको अवस्था अलि गम्भीर छ। बाँकी सबैको अवस्था सामान्य छ।
संक्रमितहरुको संख्या बढ्दै गएको छ। हाम्रो नगरपालिकामै आइसोलेसन निमार्ण गरेका छौँ। चण्डेश्वरी प्राथमिक स्वास्थ्य केन्द्र वडा नम्बर २ मा १७ बेडको आइसोलेसन तयार गरेका छौँ। यसमा आवश्यकता पर्यो भने थप्दै जान्छौँ। बुधबार हामीले निर्णय गरेर १५ बेड थप्दैछौँ। त्यसपछि आवश्यकता बढ्दै गयो भने लगभग ७० बेडसम्मको आइसोलेसन बनाउने तयारी गरेका छौँ।
हाम्रो नगरपालिकाका अधिकांश संक्रमित बलम्बुस्थित आइसोलेसनमा हुनुहुन्छ। नगरपालिकाले तयार गरेको आइसोलेसनमा ६ जना संक्रमित राखेका छौँ।
आइसोलेसन निमार्णका साथै कोरोना रोकथाम तथा नियन्त्रणका लागि हामीले कन्ट्याक्ट ट्रेसिङ तथा पिसिआर परीक्षणलाई विशेष प्राथमिकतामा राखेका छौँ। एक दिनको सय जनालाई कन्ट्याक्ट ट्रेसिङमार्फत पिसीआर परीक्षण गराईरहेका छौँ।
कोरोना नियन्त्रणका लागि हामीले सक्दो पहल गरिरहेका छौँ। कन्ट्याक्ट ट्रेसिङको दायरा फराकिलो बनाएका छौँ। पिसिआर परीक्षणका लागि आवश्यक किट केन्द्र सरकारसँग माग गरेका छौँ। पाइरहेका पनि छौँ।
हाम्रो म्यानपावर अनुसारको कामको प्रक्रियालाई हामीले अगाडि बढाइरहेका छौँ। प्रदेश सरकारले पनि ३० देखि ४० लाखसम्म बजेट पठाउने भनेर घोषणा गरिसकेको छ। तर पठाइसकेको छैन। यस्तो अवस्थामा मूलतः पैसा केन्द्रसँग माग्दै गर्ने। यो आपतको बेला त आफ्नो पनि खर्च गर्नु पर्यो नि। अहिले विकास भन्दा पनि मानवता जोगाउने हो। कसले गयो कसले गरेन भनेर आरोप प्रत्यारोप गर्ने बेला होइन, समन्वय गर्दै जाने कामको गतिलाई पनि अगाडि बढाउँदै जाने हो। स्रोत त छ नि। अहिले विकास निमार्णको काम ठप्प छ। विकासको काम गरिएको छैन। खातामा पैसा छ। आपत्कालीन अवस्थामा यसैलाई प्रयोग गर्नुपर्यो।
कोभिड रोकथाम तथा नियन्त्रणका लागि भनेर हामीले ३ करोड छुट्याएका छौँ। अहिले त्यो पैसा खर्च गरिरहेका छौँ। भोलि बढ्दै गयो भने बढीभन्दा बढी संक्रमण फैलियो, लामो समयसम्म निशेधाज्ञा जारी गर्नुपर्ने अवस्था आयो, मानिसहरुले रोजगारी पाएनन् भोकमरी बढ्दै गयो भने विकास गर्ने कि मानवता जोगाउने त? अहिले प्रमुख कर्तव्य मानवता जोगाउने हो। अरुको मुख ताक्नुभन्दा पनि दत्तचित्त भएर अगाडि बढ्नुपर्ने बेला हो। यसमा मनन गर्नुपर्नै बेला आएको छ।
अनि सरकारले भनेर मात्र पनि हुँदैन। जोखिम न्यूनीकरणका लागि व्यक्ति र समुदाय पनि सचेत हुन जरुरी छ। भिडभाडमा जानु भएन। भौतिक दूरी कायम गर्नुपर्यो। स्वास्थ्य सुरक्षाका उपाय अपनाउनुपर्यो। हामी जब आफ्नो रक्षाका लागि सचेत हुँदैनौँ तबसम्म जोखिम बढ्छ। सरकारले त स्रोतसाधन र क्षमताले भ्याएसम्म गरिरहेको छ।
हामीले कतिपय कुरामा केन्द्रीय सरकारलाई सुझाव समेत दिइरहेका छौँ। कन्ट्याक्ट टेसिङ तथा पिसिआर परीक्षणको दायरा फराकिलो बनाउनुपर्छ भनेका छौँ। हाम्रो नगरपालिकामा पनि २ हजारको पिसिआर परीक्षण गर्नुपर्यो भनेर भनेको छु। स्थानीय तहले पनि आफ्नो स्रोतसाधन र क्षमताले भ्याएसम्म काम गर्न सकिन्छ।
जोखिमपूर्ण अवस्थामा फ्रन्टलाईनमा खटेर काम गरेका स्वास्थ्यकर्मीहरुमाथि दुर्व्यवहार बढेका घटना बाहिरिरहेका छन्। यो अपराध हो। मानवता विरोधी कार्यक्रम हो। हाम्रो नगरपालिकामा सबैलाई सचेत गराएका छौँ। अहिलेसम्म यस्तो अराजक गतिविधि भएको पनि छैन। कतै यस्तो भइहाल्यो भने हामी कडा कारबाही गर्छौं।
(टोखा नगरपालिकाका मेयर अधिकारीसँग नेपाल लाइभकर्मी निर्मला घिमिरेले गरेको संवादमा आधारित)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
