फाइल तस्बिर
बनेपा- कोरोना भाइरस संक्रमित बिरामीको उपचारका लागि बनेपा नगरपालिकाले ५० शय्याको आइसोलेसन कक्ष तयार गरेको छ। बनेपा नगरपालिका-५ स्थित बनेपा प्राविधिक शिक्षालय भवनका चारवटा कक्षामा सो आइसोलेसन कक्ष तयार गरिएको हो। नगरपालिकामा हाल कोरोना संक्रमितको संख्या ६५ पुगेको छ।
तीमध्ये २८ जना उपचारपछि घर फर्किएका छन्। बाँकी ‘होम आइसोलेसन’ तथा विभिन्न अस्पतालका आइसोलेसन कक्षमा उपचाररत रहेको नगरप्रमुख लक्ष्मी नरसिंह वादेले जानकारी दिए। उनका अनुसार संक्रमितको संख्या बढ्न सक्ने भएकाले हाल ५० वेडको आइसोलेसन कक्ष तयार गरिएको हो। ‘पूर्व तयारीस्वरुप स्थानीयस्तरमै आइसोलेसन कक्ष व्यवस्थित गरेका हौं,’ उनले भने।
हाल व्यवस्थित गरिएको उक्त आइसोलेसनमा ‘होम आइसोलेसन’मा रहेका चार जनालाई राखिएको छ। तयार गरिएको सो आइसोलेसन कक्षमा पुरुष, महिला, बालबालिका तथा नर्सिङ स्टेशनका लागि छुट्टछुट्टै बेड राखिएको छ। यसअघि बनेपास्थित शिर मेमोरियल अस्पतालमा पाँच बेडको आइसोलेसन कक्ष तयार गरिएको थियो। नगरप्रमुख वादेले भने, ‘संक्रमित थपिँदैछन्, अस्पतालको पाँच बेडले कसरी धान्छ र त्यसैले हाललाई ५० वेडको आइसोलेसन कक्ष बनाएका छौं।’
सो आइसोलेसन कक्षको व्यवस्थापनका लागि बनेपाका युवा व्यवसायी रत्नकुश रञ्जितले २० बेड सहयोग गरेका थिए। अन्य आवश्यकीय सम्पूर्ण सामग्री नगरपालिकाले व्यवस्थापन गरेको प्रमुख वादेले बताए। उनका अनुसार आइसोलेसन कक्षमा इन्टरनेट सुविधाका साथै सिसिटिभी क्यामेरा जडान तथा त्यहाँ बस्ने संक्रमितका लागि स्थानीय पार्टी प्यालेसबाट खानाको व्यवस्थापन गरिएको छ।
हालसम्म जिल्लामा कोरोना संक्रमितको सङ्ख्या १४६ पुगेको छ। तीमध्ये ६२ जना उपचारपछि निको भएर घर फर्किएका छन्।
संक्रमितमध्ये एक महिला र एक पुरुषको मृत्यु भएको छ। बाँकी ८२ जना विभिन्न स्थानका आइसोलेसन कक्षमा उपचाररत रहेको कोभिड–१९ रोकथाम तथा नियन्त्रण, कमाण्ड पोष्ट काभ्रेपलाञ्चोकले जनाएको छ। यसैबीच, जिल्ला सङ्कट व्यवस्थापन केन्द्र र पोष्टको आइतबारको संयुक्त बैठकले बनेपास्थित शिर मेमोरियल तथा धुलिखेल अस्पताललाई आफ्नो कूल बेड क्षमतामध्ये ३३ प्रतिशत बेड कोरोना संक्रमितको उपचारका लागि स्थापना गर्न आग्रह गरेको छ।
पोष्टका सदस्य सचिव एवं जिल्ला स्वास्थ्य कार्यालयका प्रमुख डा. नरेन्द्र झाले आइसोलेसन कक्ष व्यवस्थित गरेका स्थानीय तहलाई बेड संख्या बढाउन तथा नभएकालाई व्यवस्थित गर्न आग्रह गरिएको बताए। ‘स्थानीय तहमा कम्तिमा १० बेडको आइसोलेसन कक्ष तयार गर्नुस् भनेर धेरैपटक आग्रह गरियो,’ उनले भने। उनका अनुसार हाल २०० बेड भएको शिर मेमोरिलमा ६ तथा ४५० बेड भएको धुलिखेलमा ३१ बेडमात्रै आइसोलेसनका लागि प्रयोग गरिएको छ।
पोष्टका अनुसार काभ्रेपलाञ्चोकमा २०७६ चैत महिनायता १३ स्थानीय तहमध्ये पाँचले मात्रै एक सय बेडको आइसोलेसन कक्ष व्यवस्थापन गरेको छ। तीमध्ये बनेपा नपामा ५०, धुलिखेलमा ३१, पनौतीमा ६, पाँचखालमा ७ र नमोबुद्ध नगरपालिकामा ६ बेडको आइसोलेसन कक्ष व्यवस्थापन गरिएको हो।
अन्य ८ स्थानीय तहले हालसम्म आइसोलेसन कक्ष व्यवस्थापन गर्न सकेका छैनन्। हालसम्म काभ्रेपलाञ्चोकका १३ स्थानीय तहलगायत संस्थाले ८४५ श्य्याको क्वारेन्टाइन व्यवस्थापन गरेका छन्। त्यसो त, जिल्लामा संक्रमित बढ्दै गएपछि आइसोलेसन बेड बढाइरहँदा क्वारेन्टाइन भने रित्तिँदै गएका छन्। हाल ३२ पुरुष र दुई महिला गरी कूल ३४ जना क्वारेन्टाइनमा बसेका छन्।
तीमध्ये बनेपामा ६, धुलिखेलमा १४, पनौतीमा २, पाँचखालमा २, नमोबुद्धमा १, मण्डनदेउपुरमा २, तेमाल गाउँपालिकामा ६ र भुम्लुमा ७ जना क्वारेन्टाइनमा बसेका हुन्। खानीखोला, रोशी, महाभारत, बेथानचोक र चौंरीदेउराली गाउँपालिकाको क्वारेन्टाइन रित्तिसकेका छन्।
हालसम्म ९४३ पुरुष र १९३ महिला क्वारेन्टाइनको बसाइ अवधि सकिएपछि घर फर्किएका छन्। हालसम्म तेस्रो मुलुकबाट मात्रै ४२६ काभ्रेली घर फर्किएको तथ्याङ्क छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
