काठमाडौं- संस्कृति पर्यटन तथा नागरिक उड्डयमन्त्री योगेश भट्टराईले विदेशबाट पिसिआर परीक्षण गरी रिपोर्ट नेगेटिभ आउनेहरुले होटल क्वारेन्टिनमा बस्नु नपर्ने स्पष्ट पारेका छन्।
विदेशबाट आउने नागरिकहरुले होटल क्वारेन्टाइनमा बस्नुपर्ने सरकारी निर्णयको आलोचना भएसँगै पर्यटनमन्त्रीले पिसिआर रिपोर्ट नेगेटिभहरु सिधै घर जान पाउने उनले स्पष्ट पारेका हुन्। सरकारले विभिन्न देशमा अलपत्र नागरिकहरुलाई उद्धार गरी होटल क्वारेन्टिनमा ७ दिन राख्ने निर्णय गरेको थियो। कोरोना संक्रमणको दर कम भएका र पिसिआर परीक्षण सहज भएका मुलुकबाट आउनेहरुले रिपोर्ट नेगेटिभ भएपछि मात्रै नेपाल ल्याइने र उनीहरूले होटल क्वारेन्टाइनमा बस्नु नपर्ने उनको भनाइ छ।
'जहाँ पिसिआर परीक्षण सहज हुन्छ र कोरोना संक्रमणको दर पनि कम छ त्यस्तो ठाउँबाट पिसिआर परीक्षण गरेका प्यासेन्जर बोकेर मात्र आउने। त्यसका लागि नियमित उडानहरु खोल्ने तयारी भएको छ। भदौँ १६ (सेप्टेम्बर १) बाट। कुन कुन देशहरु भन्ने भोली फाइनल सूची सार्वजनिक हुन्छ। मलेसिया युएइ, दक्षिण कोरिया, जापान, हङकङ लगायत हुन सक्छन्,' उनले भने, 'पिसिआर गरेका यात्रुहरुले सरकारले वेबसाइटमा राखेको फर्म भर्नुपर्छ। नेपालको ठेगाना स्पष्ट लेख्नुपर्छ। र नेपाल आइसकेपछि एयरपोर्टमा रिपोर्ट नेगेटिभ देखाउनुभयो भने १४ दिन आफ्नो घरमा होम क्वारेन्टाइनमा बस्ने प्रतिबद्धतासहित घर जान दिइन्छ।’
तर, एउटै जहाजमा आउने सबैकाे ७२ घन्टा ननाघेकाे पिसिआर रिपाेर्ट नेगेटिभ हुनुपर्ने उनको भनाइ छ। यदि कसैको रिपोर्टका मापदण्ड नपुगेको अवस्थामा भने जहाजमा आएका सबैले होटल क्वारेन्टाइनमा जानुपर्ने उनले स्पष्ट पारे।
पिसिआर परीक्षण सहज नभएका मुलुकहरुका लागि उद्धार उडान गरिने उनले बताए। पिसिआर परीक्षण नगरी नेपाल आउने नागरिकहरुले होटल क्वारेन्टाइनमा बस्नुपर्ने उनको भनाइ छ। अर्को देशबाट आएर क्वारेन्टाइनमा बस्दा व्यक्तिले नै खर्च व्यहोर्नुपर्ने नियम विश्वका अन्य मुलुकहरुमा समेत रहेको उल्लेख गर्दै उनले ११ हजारमा ७ रात र ८ दिनको होटल क्वारेन्टाइनमा बस्न सकिने बताए।
‘सात रात र ८ दिनको प्याकेज ११ हजारमा हुन्छ, यदि एक कोठामा २ जना बस्ने हो भने। सिंगल बस्ने हो भने १७ हजार ५ सय हुन्छ। दिनको १५ सयको हाराहारीमा हुन्छ। होटलहरु स्वास्थ्य मापदण्ड पूरा गरेको हुनुपर्छ, गेट र कम्पाउण्ड भएको होटल, खुला ठाउँ भएको, सफा भएको, कोठामा टिभी र वाईफाई हुनुपर्छ। एट्याच ट्वाइलेट र बाथरुम हुनुपर्छ। तातोपानी पिउने व्यवस्था गर्नुपर्छ। ४ पटक खाजा र खाना दिनुपर्छ। त्यो भन्दा महंगोमा बस्छौँ भन्नेका लागि दैनिक २५ सय र ४ हजार भन्दा बढीका होटलहरु पनि छन्।’
विदेशमा अलपत्र परेका, स्वदेश फर्किन सक्ने कुनै पनि आधार नभएका नागरिकहरुलाई भने सरकारी खर्चमा उद्धार गरिने उनको भनाइ छ।
‘मान्छेहरुले भन्छन् सरकारले खर्च व्यहोर्नुपर्छ भनेर हो सरकारले व्यहोर्ने हो। तर कसका लागि भन्दा सक्दै नसक्नेका लागि। विदेशमा अलपत्र परेका, फर्कने कुनै आधार नभएका व्यक्तिहरुलाई श्रम कल्याणकारी कोषबाट सरकारले टिकट पनि काट्छ । यहाँ आएर होटल क्वारेन्टिनको विषय पनि सरकारले व्यहोर्छ र पीसीआर खर्च पनि सरकारले व्यहोर्छ,' मन्त्री भट्टराईले भने, 'त्यसका लागि श्रम मन्त्रालयले सम्बन्धित देशको कुटनीति नियोगसँग समन्वय गरेर लिष्ट फाइनल गर्छ। त्यस्तै कुनै कम्पनीले आफ्नो कम्पनीबाट मान्छे पठाउँछ भने उहाँहरुले टिकट पनि काट्नुपर्छ। कम्पनीले नै क्वारेन्टाइन बस्दा लाग्ने खर्च व्यहोर्नुपर्छ। पिसिआर परीक्षण गरी पठाउँछु भन्यो भने पनि सरकारले त्यही अनुसार पनि उद्धार गर्छ।’
पिसिआर अनिवार्य गरिएका देशहरुबाट कोरोना पोजेटिभ भएको वा परीक्षण नगरेको व्यक्तिलाई ल्याइए सम्बन्धित एयरलाइन्स कम्पनीले सबै यात्रुहरुको क्वारेन्टिन खर्च व्यहोर्नुपर्ने उनको भनाइ छ। नेपाल घुम्न आउने पर्यटकहरुका लागि नभएर विदेशमा अलपत्र परेका नेपाली, नेपाल आउनै पर्ने कुटनीतिक नियोगका पदाधिकारीर विकास साझेदार संस्थाका कर्मचारीहरु मात्रै आउन पाउने उनले स्पष्ट पारे। परिस्थिति अनुकुल भएपछि अन्य देशहरुको समेत अवस्था हेरेर नियमित उडान सुरु हुने उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
