काठमाडौं- उपप्रधान तथा रक्षामन्त्री ईश्वर पोखरेल नेतृत्वमा रहेको सिसिएमसीको निर्देशनपछि बन्द भएको उद्धार उडान मंगलबारबाट सुरु हुने भएको छ। गत सोमबार सिसिएमसीले काठमाडौंमा क्वारेन्टाइन अभाव भएको भन्दै पाचौं चरणको उद्धार उडान बन्द गर्न परराष्ट्र र नागरिक उड्डयन मन्त्रालयलाई पत्र पठाई रद्द गराएको उद्धार उडान मंगलबारबाट सुरु हुने भएको हो।
तर यसरी उद्धार उडान सुरु भएपनि कतार एयर लाइन्स र टर्किस एयरलाइन्सले भने १ सय जना भन्दा बढी यात्रुलाई नेपाल ल्याउन नपाउने भएका छन्। यसका साथै नेपाल आउने यात्रुले अनिवार्य रूपमा पिसिआर परीक्षण गरेको र त्यसको रिपोर्ट नेगेटिभ आएकै हुनुपर्ने छ। उडान हुने समयभन्दा ७२ घण्टाअघि आएको रिपोर्टमात्र मान्य हुने व्यवस्था छ।
नयाँ कार्यतालिका अनुसार मंगलबार एयर अरेबियाले सारजाँबाट काठमाडौंका लागि उडान गर्ने भएको छ। यस्तै दुबईबाट फ्लाई दुबईले बुधबार काठमाडौंका लागि उडान भर्ने भएको छ।
अगस्ट २७ मा रियाद गएर नेपाल एयरलाइन्स आउने छ। यस्तै सोही दिन हिमालयन एयरलाइन्सले पनि दमामबाट नेपालीहरुको उद्धार गर्ने छ। सोही दिन टर्किस एयरलाइन्सले इस्तानबुलबाट बढीमा एक सय जना मात्र यात्रु लिएर नेपाल आउने छ।
अगस्ट २८ मा नेपाल एयरलाइनन्सले क्वालालम्पुरबाट, हिमालयनले पनि क्वालालम्पुरबाटै र कतार एयरलाइन्सले दोहाबाट उद्धार उडान भर्ने छ।
अगस्ट २९ मा सिल्क एयरले अस्ट्रेलियाबाट, कोरियनले कोरियाबाट उद्धार उडान गर्नेछ। अगस्ट ३० मा नेपाल एयरलाइन्स र हिमालयनले क्वालालम्पुरबाट उडान भर्ने छन्। यस्तै सोही दिन मालिन्दो एयरले मलेसियाबाट नेपालीको उद्धार उडान गर्ने तय गरिएको छ।
अगस्ट ३१ मा दुबईबाट नेपाल एयरलाइन्स र हिमालयनले आबुधाबीबाट उद्धार उडान भर्ने छ। सेप्टेम्बर १ मा भने कतार एयरलाइन्सले दोहाबाट २ उडान र कुवेत एयरले कुवेतबाट एक उडान भर्ने तय भएको हो।
यात्रुलाई सात दिन होटल क्वारेन्टाइनको व्यवस्था पनि सम्बन्धित एयरलाइन्सले नै गर्नुपर्ने भएको छ। यसका लागि उनीहरूले यात्रुसँग रकम लिएर होटललाईसमेत भुक्तानी गर्नुपर्ने भएको छ।
वायुसेवा कम्पनीले विदेशी नेपाली नियोगसँगको सहकार्यमा मात्र नेपालीलाई ल्याउन पाउने तर टिकटको व्यवस्था भने कम्पनीले नै गर्नुपर्ने समेत स्पष्ट पारिएको छ।
युरोप अमेरिकाबाट नेपाल फर्कनैपर्ने वा त्यसतर्फ प्रस्थान गर्नैपर्ने अवस्था भएको खण्डमा समेत यो नियम लागू हुने बताइएको छ।
होटल क्वारेन्टान अभाव वा संक्रमण बढ्दै गएको अवस्थामा भने जनुसुकै बेला पनि यो तालिका रद्द हुन सक्ने समेत नेपाल नागरिक उड्डयन प्राधिकरणले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
