काठमाडौं- सत्तारुढ नेपाल कम्युनिस्ट पार्टी (नेकपा) को विवाद समाधान कार्यदलप्रति माधव नेपाल पक्षका नेताहरुले आफ्नो गुनासो नरहेको प्रतिक्रिया दिएका छन्। कार्यदलले विवाद समाधान हुनेगरी प्रतिवेदन ल्याएकाले आफूहरुको कुनै चित्त दुखाई नरहेको सो पक्षका कतिपय नेताहरुको भनाइ छ।
अध्यक्ष केपी ओली र पुष्पकमल दाहाल प्रचण्डको हित हुने गरी प्रतिवेदन आएको र माधव नेपाल पक्षलाई पर धकेलिएको आशंका विश्लेषण हुन थालेको छ। तर, नेपाल पक्षका मुख्य नेताहरुले प्रतिवेदनको खुलेर प्रशंसा नगरे पनि आफूहरुको गुनासो नरहेको बताएका छन्। ‘हामीले कुनै पद प्रतिष्ठाका लागि प्रधानमन्त्री केपी ओलीको राजीनामा मागेका थिएनौं’, नेता अष्टलक्ष्मी शाक्यले भनिन्, ‘पार्टीलाई एउटा विधि र पद्धतिमा लग्नलाई संघर्ष गरेका हौं। पार्टी एकताबद्ध हुन्छ, पार्टी विधिमा चल्छ भने कुनै गुनासो छैन।’
प्रचण्ड र नेपालले पदका लागि झगडा गरेका हुन् भन्ने जस्तो देखिए पनि भित्री रुपमा पार्टीलाई विधि र पद्धतिमा हिँडाउनका लागि संघर्ष गरिएको उनको भनाइ छ।
कार्यदलले सिंगो पार्टीलाई एकताबद्ध गराउन प्रतिवेदन ल्याएकाले पूर्ण रुपमा पालना गरेर जानुपर्ने शाक्यको भनाइ छ। कार्यदलले ल्याएको विषय सचिवालय र स्थायी कमिटीमा समेत छलफल हुनुपर्ने उनी बताउँछिन्।
प्रधानमन्त्री ओली विधान अनुसार चल्छु भनेपछि महामारीका बेला धेरै लफडा नगरिएको सो पक्षका अन्य नेताहरुको भनाइ छ। कार्यदलले आफ्नो प्रतिवेदन बुझाए पनि सचिवालय र स्थायी कमिटीमा विस्तृत छलफल भएपछि मात्रै धेरै विषय खुल्दै जाने स्थायी कमिटी सदस्य वेदुराम भुसालले बताए। ‘हामीले पनि प्रतिवेदन विस्तृतमा अध्ययन गरेका छैनौं। पार्टी कमिटीमा विभिन्न कोणबाट छलफल होला’, भुसालले भने, ‘त्यसपछि मात्रै पार्टीमा कार्यदले के कस्तो राम्रो-नराम्रो गर्यो भन्न सकिन्छ।’
तर कार्यदलको प्रतिवेदनबाट ओली पक्षका नेताहरुले भने जितको महसुस गर्न थालेका छन्। मुख्यतः प्रधानमन्त्रीको अडानलाई प्रतिवेदनले अनुमोदन गरेको छ। पार्टीमा विवाद उत्कर्षमा पुगेपछि विभाजनसम्मको आशंका बढेका बेला कार्यदलले पार्टी एकतालाई सुनिश्चित गरेको उनीहरुको भनाइ छ।
विवाद समाधान गर्न अध्यक्षद्वय ओली र प्रचण्ड कार्यदल बनाउन सहमत भएका थिए। यद्यपि, कार्यदलको प्रतिवेदनमाथि कमिटीमा कसरी छलफल हुन्छ र कार्यान्वयन कसरी हुन्छ भन्ने कुराले पनि पार्टीभित्रको विवादको अन्त्य संकेत गर्छ।
साउन ३० गते महासचिव विष्णु पौडेलको संयोजकत्वमा ६ सदस्य कार्यदल गठन गरिएको थियो। जसको सदस्यमा शंकर पोखरेल, जनार्दन शर्मा, सुरेन्द्र पाण्डे, पम्फा भुसाल र भीम रावल थिए। कार्यदलले एक हप्ता लगाएर पार्टीका विवाद समाधानका विषयमा शनिबार दुई अध्यक्षलाई प्रतिवेदन बुझाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
