काठमाडौं-घरेलु टोली इंग्ल्यान्डसँगको तेस्रो टेस्ट क्रिकेट खेलको पहिलो इनिङमै पाकिस्तान ३१० रनको फराकिलो अन्तरले पछि परेको छ।
तेस्रो दिनको समाप्तिमा पाकिस्तानले सबै विकेटको क्षतिमा २७३ रनमात्रै बनाउन सक्यो। पाकिस्तानका लागि कप्तान अजहर अलीले अविजित १४१ रन बनाए। मोहम्मद रिजवानले ५३, फावद आलमले २१, यसिर शाहले २० र बाबर अजामले ११ रन बनाउन बाहेक अन्य खेलाडीले दोहोरो अंक बटुल्न सकेनन्।
कप्तान अलीलाई मैदानमा साथ दिन कसैले सकेनन्। कप्तान अली र रिजवानले १३८ रनको साझेदारी गर्दै टिमलाई उकास्न खोजेका थिए। तर छैटौं विकेटको रुपमा रिजवान आउट भएसँगै एकपछि अर्को विकेट पतन सुरु भयो। बलिङतर्फ जेम्स एन्डर्सनले ५ विकेट लिए। त्यस्तै, स्टुआर्ट ब्रोडले २ विकेट लिए।
पहिलो इनिङमै ३१० रनले पछि परेको पाकिस्तान हारनजिक छ। अब चौथो दिन इंग्ल्यान्डले आफ्नो दोस्रो इनिङ थाल्नेछ। दोस्रो इनिङमा इंग्ल्यान्डले एक सय रन माथि बनाए पनि पाकिस्तानले ठूलो लक्ष्य पाउने छ।
साउथह्याम्पटनमा यसअघि टस जितेर पहिले ब्याटिङ गरेको इंग्ल्यान्डले ८ विकेटको क्षतिमा ५८३ रनको उच्च स्कोर बनाएसँगै पहिलो इनिङ समाप्तिको घोषणा गरेको थियो। १२ रन हुँदा रोरी बुर्नसलाई ६ रनमा गुमाएको इंग्ल्यान्डले ७३ रन हुँदा दोस्रो विकेटको रुपमा डोम सिबलीलाई २२ रनमा गुमाएको थियो। तेस्रो नम्बरमा ब्याटिङ गर्न आएका क्रवली र छैटौं नम्बरमा आएका बटलरले टिमलाई उकासे। क्रवलीले दोहोरो शतक बनाए। उनले २६७ रन बनाउने क्रममा ३४ चौका र एक छक्का प्रहार गरे। उनको यो करिअरकै उच्च स्कोर हो।
त्यस्तै, बटलरले शतकसहित १५२ रन बनाए। बटलरको पनि यो टेष्ट करिअरमा अहिलेसम्मकै उच्च स्कोर हो। इंग्ल्यान्डको विशाल स्कोर बनाउने क्रममा क्रवली र बटलरले ३५९ रनको साझेदारी गरे। त्यस्तै, क्रिस वोक्सले ४०, कप्तान जोइ रुट २९ र डोम बेसले अविजित २७ रन बनाए। बलिङतर्फ पाकिस्तानका यासिर शाह, शाहिन शाह अफ्रिदी र फावद आलमले समान २–२ विकेट लिए।
तीन खेलको टेस्ट क्रिकेट सिरिजमा इंग्ल्यान्डसँग बराबरी गर्न यो अन्तिम खेल पाकिस्तानले जित्नै पर्ने हुन्छ। तर पाकिस्तान खेलको सुरुदेखि नै कमजोर देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781591850-1781592603.jpg)
-1764146706.png)
