.jpg)
फाइल तस्बिर
काठमाडौं- भक्तपुरस्थित चाँगुनारायण नगरपालिकामा आइतबारसम्म २१ जनामा कोरोना पुष्टि भएको छ। कोरोना पोजिटिभ देखिएकाहरु अधिकांश जनसम्पर्कमा रहने व्यक्तिहरु छन्।
नगरपालिकाका मेयर सोमप्रसाद मिश्रका अनुसार नगरपालिकामा देखिएका कोरोना संक्रमितमध्ये विदेशबाट फर्किएका, प्रहरी, पत्रकार, पाइलट, अस्पतालका बिरामी कुरुवालगायत बढी जनसम्पर्कमा रहने व्यक्तिमा कोरोना देखिएको छ।
गाईजात्रा मनाउन भन्दै भिडभाडमा निस्किएकाहरुमा समेत कोरोना देखिएको मेयर मिश्रले बताए। नगरपालिकाको वडा नम्बर १ को सरस्वती खेल, वडा नं ३, वडा नं ४ माछिपौवा, वडा नम्बर ७ र ८ मा कोरोना संक्रमित भेटिएको नगरपालिकाले जनाएको छ।
कोरोना जितेर घर फर्किए १६ संक्रमित
‘हाम्रो नगरपालिकामा अहिलेसम्म २१ जनामा कोरोना देखिएको छ। १६ जना निको भइसक्नु भयो। ५ जना आइसोलेसनमा हुनुहुन्छ। २ जना होम आइसोलेसनमा हुनुहुन्छ। ३ जना अस्पतालमा हुनुहुन्छ’ नगरपालिकाका मेयर सोमप्रसाद मिश्रले भने।
पछिल्लो समय कोरोना जितेर घर फर्किनेको संख्या बढेको छ। निको हुनेको संख्या बढे पनि कोरोनाको जोखिम भने घटेको छैन।
संक्रमितको संख्या बढ्ने देखिएपछि क्वारेन्टाइनलाई आइसोलेसन
पछिल्लो समय देशका अधिकांश स्थानमा कोरोना संक्रमणले तीव्र रुप लिन थालेपछि कोरोनाको उपचार गर्दै आएका प्रायजसो अस्पतालहरु भरिन थालेका छन्।
अस्पतालका बेड भरिन थालेपछि कतिपय स्थानीय तहहरू आफैंले छुट्टै आइसोलेसनको व्यवस्थापन गर्न सुरु गरेका छन्। चाँगुनारायण नगरपालिकाले पनि भक्तपुर जिल्लाका अन्य नगरपालिकाहरुसँग मिलेर २ सय बेडको आइसोलेसन तयार गरेको नगरपालिकाले जनाएको छ।
‘हामी भक्तपुर जिल्लाका ४ वटा नगरपालिका मिलेर खरिपाटी क्वारेन्टाइनलाई २ सय बेडको आइसोलेसनमा परिणत गरेका छौं। जसले गर्दा नगरपालिकामा आइसोलेसन बेडको अभाव छैन’ मेयर मिश्रले भने।
कोरोना संक्रमणको अवस्था बढ्दै गएर खरिपाटी आइसोलेसन समेत भरिने अवस्था आयो भने छुट्टै आइसोलेसनको व्यवस्था गरिने उनले बताए।
कोरोना रोकथाम तथा नियन्त्रणका लागि गर्नुपर्ने जति कुनै पनि कसर बाँकी नराखेको उनको भनाइ छ।
मेयर सोमप्रसाद मिश्र भन्छन्, ‘हामीले क्वारेन्टाइनदेखि आइसोलेसनसम्मको व्यवस्थापन गरेका छौं। कोरोनाबाबट बच्न सचेतनाका कार्यक्रम गरिरहेका छौं। टोलटोल पुगेर पर्चा बाडेका छौं।’
नगरपालिकामा आवश्यक आधारभूत स्वास्थ्य सामग्री उपलब्ध गराएको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769347165.png)
-1764146706.png)
