फाइल तस्बिर
काठमाडौं- नेपाली कांग्रेसले मेडिकल सामग्री खरिद प्रक्रियालाई पारदर्शी बनाएर कार्य गर्न सरकारलाई पुनः स्मरण गराएको छ। पार्टी सभापति शेरबहादुर देउवाले विज्ञप्तिमार्फत् मापदण्डयुक्त सामग्रीमात्रै खरिद गर्न सरकारको ध्यानाकर्षण गराएका छन्।
‘फ्रन्ट लाइन’मा कार्यरत स्वास्थ्यकर्मीहरूको उच्च सह्राहना गर्दै देउवाले मनोवैज्ञानिक वातावरणमा खलल हुन नदिन सरकारसँग आग्रह गरेका छन्। लकडाउन र निषेधाज्ञाको समयलाई उपयोग गरेर कोरोनाविरुद्धको संघर्षलाई नयाँ ढंगले व्यवस्थित गर्न देउवाले सरकारसँग माग गरेका छन्।
विदेशबाट फर्केनेका विषयमा सरकार नीति र व्यवहार दुवैमा अस्पष्ट रहेको उनले जनाए। सरकारले देखाएको ढिलासुस्ती र अन्यौलताले प्रवासी नेपालीको पीडामाथि पीडा थपिएको देउवाद्वारा जारी विज्ञप्तिमा उल्लेख छ।
देउवाको अपील:
प्रतिकुल वातावरण र सामग्री अभावका बीच स्वास्थ्यकर्मीहरुले ‘फ्रन्ट लाइन’ मा रहेर उच्च मनोबलले कार्य गरिरहनु भएको छ। म हृदयदेखि नै उहाँहरुको प्रशंसा गर्दै अत्यावश्यक स्वास्थ्य सामग्रीको पर्याप्त व्यवस्था गर्न र काम गर्न अत्यावश्यक सहज मनोवैज्ञानिक वातावरणमा खलल हुन नदिन विशेष ध्यान पुर्याउन सरकारलाई आग्रह गर्दछु।
कतिपय ठाउँमा स्वास्थ्यकर्मीहरुलाई निरुत्साहित गर्ने प्रकृतिका घटना भएको सुन्नुपर्दा दुःख लागेको छ। स्वास्थ्यकर्मीहरु र स्थानीय नागरिकबीच कुनै पनि प्रकृतिको असमझदारी र द्वन्द्व उत्पन्न हुन नदिन सतर्कताका लागि म तीनवटै तहका सरकारहरुलाई सजग गराउन चाहन्छु। आजको युद्ध सिंगो संसारले स्वास्थ्यकर्मीहरुको नेतृत्वमा लडिरहेको छ। आफू र आफ्नो परिवारको जोखिम लिएर मानवीय सेवाको कर्तव्य वहन गरिरहेका स्वास्थ्यकर्मीहरुको मनोबल उच्च राख्नु हामी सबैको अभिभारा हो। यो दायित्वलाई गम्भीरतापूर्वक आत्मसाथ गर्न म समस्त दिदिबहिनी दाजुभाइलाई आग्रह गर्दछु।
आफ्नो जीवन जोखिममा राखेर स्वास्थ्यकर्मीहरुसँगै अहोरात्र कार्य गरिरहेका सुरक्षाकर्मी, सूचना सम्प्रेषणको भूमिका निरन्तर निभाइरहेका संचारकर्मी एवं हाम्रा गाउँ शहरदेखि अस्पतालसम्मको सफाइमा खटिएका सफाइकर्मीहरुलाई हृदयदेखि सम्मान गर्दै यो प्रतिकूलतामा निर्वाह गरेकोको भूमिकाको उच्च सह्राहना गर्दछु।
समयको सदुपयोग गरेर सबल ढंगले कार्य गर्न सरकारलाई अपील
लकडाउन र निषेधाज्ञाको समयलाई उपयोग गरेर कोरोनाविरुद्धको संघर्षलाई नयाँ ढंगले व्यवस्थित गर्न म सरकारलाई अपील गर्दछु। पिसिआर परीक्षण ७७ जिल्लामै गर्नेगरी अविलम्ब क्षमता विस्तार गरेर समुदायस्तरमा परीक्षण व्यापक रुपले पुर्याउन माग गर्दछु। कोभिड अस्पतालहरु निश्चित र व्यवस्थित गर्न, पर्याप्त आइसोलेसन वार्ड व्यवस्था गर्न, अत्यावश्यक भेन्टिलेटर जोहो गर्न माग गर्दछु। खरिद प्रक्रियालाई पारदर्शी बनाएर कार्य गर्न र मापदण्डयुक्त सामग्रीमात्रै खरिद गर्न सरकारलाई आग्रह गर्दछु।
क्वारेन्टाइनहरु व्यवस्थित नहुँदा कोरोनाको विस्तारमा योगदान पुगेको घटनाहरु स्मरण गर्दै मापदण्डयुक्त क्वारेन्टाइनहरुको व्यवस्थापनमा अविलम्ब ध्यान पुर्याउन सरकारको ध्यानाकर्षण गराउँदछु।
विदेशमा रहेका नेपालीहरुबारे
लाखौंको संख्यामा विदेशमा रहेका नेपाली दिदीबहिनी दाजुभाइलाई कोरोना संक्रमणबाट आफू र आफ्नो परिवारलाई सतर्कतापूर्वक जोगाउन अपील गर्दछु। नेपाली जनसम्पर्क समितिहरु तथा देश बाहिर रहेका सबै संघसंस्था र नेपाली दूतावासहरुलाई यो प्रतिकूलताका घडी डायस्पोराका नेपालीहरुको हितमा ऐक्यबद्ध ढंगले कार्य गर्न आग्रह गर्दछु।
विदेशमा अप्ठ्यारोमा परेर देश फर्कन चाहने नेपालीलाई उद्वार गर्न नेपाली कांग्रेसले शुरुआतदेखि नै सरकारलाई आग्रह र माग गर्दै आएको छ। नीति र व्यवहार दुवैमा अस्पष्ट रहेर सरकारले देखाएको ढिलासुस्ती र अन्यौलताले प्रवासी नेपालीको पीडामाथि पीडा थपिएको छ। विदेशमा रोजगार गुमाएर बेखर्ची समेत भएका युवाहरूलाई कल्याण कोषको रकम प्रयोग गरेर निःशुल्क उद्वार गर्न म सरकारसँग माग गर्दछु।
पार्टीका सबै तहका साथीहरू र स्थानीय तहको नेतृत्वलाई
कोरोनाको संक्रमणबाट जनताको जीवन रक्षामा समर्पित हुनु आज हामी सबै राजनैतिक दल एवं संघसंस्थाहरुको साझा कर्तव्य भएको छ। आपसी एकता र विश्वासका साथ आफ्नो कार्यक्षेत्रमा उच्चतम मानवीय भावना साथ थप क्रियाशील रहन म नेपाली कांग्रेसका साथीहरूसँगै सबै दल, संघसंस्थामा आवद्ध मित्रहरूलाई आग्रह गर्दछु।
प्रत्यक्ष जनतासँग सम्पर्कमा रहेर कार्य गरिरहेका देशभरिका स्थानीय तहका सबै थरी नेतृत्वको सह्राहना गर्दै कोरोनाविरुद्धको संघर्षका स्थानीय कमजोरीको पहिचान एवं सबैथरि एक भएर कार्य गर्ने इच्छाशक्तिका साथ निदान गर्दै अघि बढ्न हार्दिक अपील गर्दछु।
जय नेपाल !
शेरबहादुर देउवा
सभापति
नेपाली कांग्रेस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
