काठमाडौं- प्रदेश २ को धेरै जिल्ला संक्रमणको चपेटामा छन्। यीमध्ये सबैभन्दा प्रभावित जिल्ला पर्सा हो। तराइको यो जिल्लामा संक्रमण फैलिनुको पहिलो कारण खुल्ला सीमा हो। योसंगै यहाँमा मानिसहरुमा जनचेतनाको अभावले पनि कोरोनाले पर्सामा महामारीको रूप लिएको छ। लक्षण नदेखिएको र मानिसहरूले मास्क लगाउने र सामाजिक दुरी पालना गराउने कुरा आकाशकै फलझैं भएको छ।
शनिबारमात्र नगरबासी एक जना कोरोना संक्रमितले ज्यान गुमाउनु पर्यो। हामीले बचाउने कोसिस गर्दा गर्दै एक जनालाई गुमाएका छौँ। मृत्यु हुने बहुदरमाई नगरपालिका वडा न.४ का ६१ वर्षीय वृद्ध हुन्। अली अर्थो ट्रामा सेन्टरमा कोरोना पुष्टि भएपछि उनको उपचार भइरहेको थियो। केही दिनदेखि अवस्था जटिल भएपछि नगरपालिकाले नारायणी कोभिड अस्थायी कोरोना अस्पताल वीरगंज पठाइएको थियो।
उनको गत भदौ ३ गते स्वाब संकलन गरिएको थियो। पिसिआर रिपोर्ट पोजेटिभ आएपछि भदौ ४ रति ८ः३० बजे अस्पताल पठाइएको थियो। मृत्यु भएका पुरुषमा श्वासप्रश्वास,टाउको दुखाई,वान्ता,दम हुने समस्या कारण गत श्रावण ३१ गते उनको अली अर्थो ट्रामा सेन्टरमा उपचारको लागी भर्ना गरिएको थियो। नगरमा रहेका संक्रमितमध्ये लक्षण भएका बिरामी उनी मात्र थिए।
अहिले म आफैं पनि दुई हप्तादेखि कोरोना संक्रमित भएर होम आइसोलेनमा बसेको छु। जनतालाई कोरोनाबारे भन्दाभन्दै कति बेला मलाई संक्रमण भयो पत्तै पाउन सकिनँ। परीक्षण गर्दा कोरोना पोजेटिभ आयो। अहिले घरबाटै नगरपालिकाको काम गरिरहेको छु।
मैले सावधानी अपनाएकाले मेरो घर परिवारमा भने संक्रमण फैलन पाएन।
हाल नगरपालिकामा १२३ जना संक्रिय संक्रमित छन्। नगरभित्र १४४ जनामा संक्रमण पुष्टि भएकोमा २० जना उपचारपछि निको भएर फर्केका छन्।
विद्यालयलाई आइसोलेसन सेन्टर
नगरपालिकाभित्र कोरोना संक्रमितको संख्या बढ्दै गएको र नारायाणी अस्पतालमा ठाउँ नहुने थालेपछि आफैं आइसोलेन निर्माण गरेका छौँ। क्वारेनटाइन निर्माण गरिएको अस्पताललाई अहिले अस्थायी आइसोलेसन बनाएका छौँ। नगरका तीन वटा विद्यालयलाई आइसोलेसन र सेमी आइसोलेन बनाएर चलाएका छौँ। अहिले ६० जना होम आइसोलेसनमा छन् भने ६३ जना नगरले बनाएको अस्थायी आइसोलेनमा रहेका छन्।
चुलिमेराको क्वारेनटाइनलाई ५० वेडको आइसोलेन बनाएर चलाइरहेका छौँ। नगरका अधिकांश संक्रमितमा लक्षण नभएकाले आइसोलेनमा राखेका छौँ। नगरले सेमीआइसोलेनको रुपमा महावीर साह माध्यमिक विद्यालय र सीताराम आधारभूत विद्यालय भौराटारमा बनाएका छौँ।
मेयर र दुई वडाध्यक्ष संक्रमित
कोरोना महामारी अहिले सबैका घरघरमा पुगेको छ। जनप्रतिनिधि पनि यसको संक्रमणमा परेका छन्। मसहित चार र पाँच नम्बर वडाका वडाध्यक्ष संक्रमित भएर होम आइसोलेनमा छौँ। हामीलाई स्थानीयबाटै संक्रमण भएको हुनुपर्छ। जनतासँग धेरै भेटघाट हुने भएकाले त्यहीँबाट सरेको भन्ने हाम्रो अनुमान हो।
एउटै टोलमा ६५ संक्रमित
नगरको भौहराटार टोलमा मात्र ६५ संक्रमित रहेका छन्। यो नगरको कोरोना हटस्पट बनेको छ। यही कारण यही नजिकै रहेको एक विद्यालयलाई हामीले आइसोलेन सेन्टर बनाएका छौँ। उक्त विद्यालयलाई थप मर्मत गर्दै अहिले संक्रमणको लक्षण नदेखिएका तर पोजेटिभ आएका मानिसहरुलाई राखेका छौँ। नगरपालिका र वडाले नियमित रुपमा संक्रमितहरुको अनुगमन गर्ने गरेको छ।
आइसोलेनबाट भागेर काममा
यो नगरका धेरै मानिस निरक्षर भएकाले बुझाउन नसकिएको अवस्था छ। मास्क लगाउने, सामाजिक दुरी पालना गराउने र साबुनपानीले हात धुने कुरा सुनाउँदा यहाँ नौलो हुन्छ। मानिसहरु यो कुरा पालना गर्दैनन्। नगरले सबै वडामा मास्क र साबुन वितरण गरेको छ तर उनीहरूले त्यसको प्रयोग गर्न नचाहेको पाइएको छ। केही दिनअघि आइसोलेनमा रहेका संक्रमित खेतमा काम गर्न पुगेको पाइयो।
लक्षण नभएकाले मलाई केही भएको छैन भन्दै मानिसहरु आइसेलेसन सेन्टरबाट बाहिर हिँड्न बल गर्छन्। नगरले आफूहरुलाई अनावश्यक रुपमा थुनेर राखेको भन्दै उनीहरुले समय समयमा झगडा समेत गर्ने गरेका छन्। नगरको रहरले कसैलाई थुनेको होइन, यो समुदायमा फैलन्छ भनेर हामी बुझाउन खोज्छौ तर उनीहरु बुझ्नै खोज्दैनन्।
होम आइसोलेनमा राख्दा समस्या
संक्रमितहरू होम आइसोलेनमा बस्ने भनी घर जाने तर त्यहीँबाट काम गर्न जाने र परिवारसँग घुलमिल हुने गरेको समेत भेटिएको छ। होम आइसोलेनमा सधैं अनुगमन गर्न सम्भव नहुने भएकाले उनीहरुले त्यसको बेवास्ता गरेको पाइएको छ। लक्षण नभएकाले केही भएको छैन भनेर उनीहरु काममा समेत गएर धेरै मान्छे भेटेको समेत पाइएपछि अहिले नगरले कडाई गरेको छ।
आइसोलेसनको खानामा सधै विवाद
शिक्षा र नजचेतनाको कमीका कारण मानिसहरुले सानो सानो कुरामा पनि झगडा गर्ने गरेका छन्। दाल पातलो भयो भन्नेदेखि नुन नलागेसम्मका कुरामा उनीहरुले झगडा गर्ने गरेका छन्। गाउँका अशिक्षित मानिस भएकाले चेतनाको कमी हुँदा कहिलेकाहीँ राजनीतिक मुद्दा समेत बन्ने गरेका छन्। कसैले केही भनेमा झट्ट पत्याउने अनि नगरपालिकाले गरेन भनेर गुनसाो आउने क्रम अहिले सामान्य छ। यही जनताले छानेर पठाएकाले उनीहरुको गुनासाो सुन्ने र चित्त बुझाउने मेरो जिम्मेवारी हो। यही सम्झेर मैले सबैलाई समान ठानेर काम गर्ने गरेको छु।
उपमेयरले चलाउँदै नगरपालिका
अहिले नगरको सबै काम उपमेयरले चलाउँदै आउनु भएको छ। उपमेयर गायत्री देवीसँग म टेलिफोनमा रायसल्लाह र नगरको कामबारे दैनिक कुराकानी हुन्छ। मलाई दोस्रो पटक पनि कोरोना पोजेटिभ भएपछि अहिले पूर्णं रुपमा आराममा छु। म आराममा रहेपनि नगरको चिन्ता भने कम भएको छैन।
मानिसहरु अशिक्षित छन्, बुझ्दैनन्। त्यसैले यो फैलेर झन् महामारी हुने हो कि भन्ने डर लागिरहेको छ। संक्रमण समुदायमा पुगिसकेकाले सर्न धेरै समय नलाग्ने देखिएको छ। एउटै टोलमा ६० भन्दा धेरै संक्रमित भएकाले उनीहरुबाट अन्यमा छिटो संक्रमण हुने डर भएको छ। कहिलेकाही आइसोलेनमा राखेका मानिसहरुलाई छुटाउन राजनीतिक दबाब समेत आउने गरेको छ। हामी सबैलाई बुझाएर पठाउने गरेका छौँ। स्थानीयहरुले कोरोना संक्रमित राख्न नदिने भनी कहिलेकाही अवरोध पनि गर्ने गरेका छन्। संक्रमित राख्दा आफूहरुलाई पनि सर्ने उनीहरुको तर्क हुन्छ। तर नगरले उनीहरुलाई आफू पनि बिरामी हुन सक्ने भन्दै बुझाएर राख्ने गरेको छ।
प्रदेश र केन्द्रको सहयोग पाएनौं
प्रदेश र केन्द्रबाट नगरले उचित सहयोग पाएको छैन। हामीले पटक पटक सहयोगको आग्रह गरेपनि पाउन नसकेकाले अहिले स्थानीय तहबाट भएको रकम काम गरिहेका छौँ।
नगरमा भएको रकमले क्वारेनटाइनदेखि आइसोलेसनसम्म चलाएका छौँ। प्रदेश र केन्द्रलाई हामीले सहयोग मागिरहेका छौँ। भोलिका दिनमा सहयोग होला भन्ने आशा राखेका छौँ।
(साह बहुदरमाई नगरपालिकाका मेयर हुन्।)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766673313.png)
-1764146706.png)
-1766648928.png)
-1763721444.png)
