काठमाडौं- काभ्रेपलाञ्चोकको धुलिखेल नगरपालिकामा बागमती प्रदेश सरकारले प्रादेशिक जनस्वास्थ्य प्रयोगशाला स्थापना गरेको छ। कोरोना महामारी बढिरहेका बेला कोरोनासँगै अन्य प्रकारका रोगहरुको पहिचान र परिक्षण गर्ने उद्देश्यले प्रादेशिक प्रयोगशाला धुलिखेलमा स्थापना गरिएको बागमती प्रदेशका सामाजिक विकासमन्त्री युवराज दुलालले बताए।
‘बागमती प्रदेशका १३ जिल्लाका नागरिकहरुका लागि २४ सै घण्टा सेवा उपलब्ध गराउने गरी प्रादेशिक जनस्वास्थ्य ल्याब स्थापना गरिएको हो’ सामाजिक विकास मन्त्री दुलालले भने‚ ‘अन्य ल्याबहरुले परीक्षण र पहिचान गर्न नसकेका जटिल प्रकारका रोगहरु समेत यो प्रयोगशालामा परीक्षण हुनेछ।’
कोरोनाको परीक्षणसँगै अन्य रोगहरुको पहिचान र परीक्षणले नागरिकहरुलाई थप सहज बनाउने उनले बताए।
प्रादेशिक जनस्वास्थ्य प्रयोगशालाका निर्देशक नारायण कार्कीले प्रदेश स्तरका सबै प्रकारका परीक्षण गर्ने र अन्य प्रयोगशालाले पहिचान गर्न नसक्ने खालका रोगहरु समेत यही ल्याबबाट परीक्षण हुने बताए। बागमती प्रदेश सरकारको राजधानी मकवानपुरको हेटौंडामा भए पनि काभ्रे तथा आसपासका जिल्लाहरुमा सेवा कार्यालयहरु स्थापना गर्ने सरकारको नीतिअनुसार प्रादेशिक प्रयोगशाला धुलिखेलमा स्थापना गरिएको मन्त्री दुलालले बताए।
धुलिखेल नगरपालिकाले प्रयोगशाला व्यवस्थापनका लागि चार वर्षका लागि भवन उपलब्ध गराएको छ। चार वर्षपछि नगरपालिकाले उपलब्ध गराएको जग्गामा प्रयोगशालाको भवन निर्माण हुनेछ। दैनिक १ हजार स्वाब परीक्षण गर्नेगरी प्रयोगशालामा जनशक्ति व्यवस्थापन गरिने मन्त्री दुलालले बताए।
सरकारी स्तरका दरबन्दीमा १३ र करारमा ९ जना कर्मचारीहरुले उक्त प्रयोगशालामा कार्य गर्नेछन्। पहिलो चरणमा काभ्रेपलाञ्चोक, सिन्धुपाल्चोक, दोलखा, रामेछाप, सिन्धुली र भक्तपुर जिल्लाका नागरिकहरुको कोरोनासम्बन्धी परीक्षण गर्नेछन् भने भक्तपुर र सिन्धुलिमा कोरोना परीक्षणका लागि प्रदेश सरकारले अर्काे प्रयोगशाला स्थापना गरेपछि तीन जिल्लाको मात्रै परीक्षण हुनेछ।
धुलिखेल अस्पतालमा यसअघि परीक्षण हुँदै आएको प्रयोगशाला, स्वचालित थप अर्काे प्रयोगशला र प्रादेशिक प्रयोगशालाबाट द्रूत गतिमा परीक्षण हुँदा नागरिकहरुले स्वाब संकलन गरेको भोलिपल्टै जानकारी पाउनेछन्। प्रयोगशालाको कमीका कारण स्वाब संकलन गरेको झण्डै साता दिनसम्म व्यक्तिले आफ्नो बारेमा जानकारी पाउन नसक्दा समुदायमा संक्रमण फैलिरहेको थियो। त्यो समस्याबाट मुक्त हुनेगरी सरकारले काम गरिरहेको मन्त्री दुलालले जानकारी दिए।
धुलिखेल नगरपालिकाका प्रमुख अशोक ब्याञ्जुले प्रादेशिक जनस्वास्थ्य प्रयोगशालाका लागि नगरपालिकाले आवश्यक व्यवस्थापनका लागि सहयोग पुर्याएको बताए। आगामी दिनमा प्रयोगशालाका लागि सहयोग गर्ने र नागरिकहरुको स्वास्थ्यका लागि धुलिखेल नगरपालिकालाई स्वस्थ शहर बनाउन प्रयोगशाला स्थापनाले थप सहयोग पुग्ने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
