काठमाडौं–
‘माननीयज्यू नमस्कार’
मंगलबार अछामका सांसद यज्ञवहादुर बोगटीको मोवाइलमा फोन आयो। यसरी फोन गर्ने व्यक्ति काठमाडौं महानगरपालिकाबाट एक कर्मचारी थिए।
‘तपाईंको कोरोना परीक्षण रिपोर्ट पोजेटिभ आएको रहेछ, त्यसैले जानकारी दिन फोन गरेको। तपाईंसँग सम्पर्क भएका व्यक्तिहरुको कन्ट्याक्ट ट्रेसिङ गर्नुपर्ने भयो। कता हुनुहुन्छ। कन्ट्याक्ट ट्रेसिङमा सहयोग गरिदिनुप¥यो,’महानगरका कर्मचारी भन्दै थिए।
महानगरका कर्मचारीले यति भनिसक्दा उनी झसंग भए। किनकि तीन दिन अघि उनको मोवाइलमा नेगेटिभ भएको एसएमएस आएको थियो। स्वाब दिएर एकान्तवास बसेका उनी नेगेटिभ रिपोर्ट आएपछि निर्धक्क भएर साथीभाई भेट्नेदेखि अन्य कामका लागि हिँडिरहेका थिए। तर एक्कासी पोजेटिभ आएको खबरपछि उनी तीन छक परे।
कुनै त्रुटिले होला भनेर उनले राष्ट्रिय जनस्वास्थ्य ल्याबदेखि टेकु अस्पतालसम्म वुझे। करिब तीन घन्टा लगाएर बुझेपछि आफूलाई कारोना संक्रमण भएको पुष्टि पाए। यस्तो लापरबाहीले बोगटी आफै अचम्ममा परे। तीन दिनअघि नेगेटिभ, अहिले कसरी पोजेटिभ भयो भन्दै उनी आफैंलाई प्रश्न गर्दै रहे।
नेकपा महासचिव विष्णु पौडेलका सुरक्षाकर्मीलाई कोरोना पोजेटिभ देखिएपछि अछामका सांसद बोगटीले आफू र आफ्नो पिएको कोरोना परीक्षण गराएका थिए। साउन ३० गते उनको रिपोर्ट नेगेटिभ आएको जानकारी मोवाइल एसएमएसमा आएको थियो। अनि उनी निर्धक्कसँग साथीभाईसँग भेटघाटमा लागेका थिए।
ललितपुरमा बसोबास गर्दै आएका उनका पिएको ३१ गते पोजेटिभ आयो। पिएलाई पोजेटिभ आए पनि आफू संक्रमित नभएकोमा उनी ढुक्क थिए किनकि उनको ल्याब रिपोर्ट नेगेटिभ थियो। यही रिपोर्ट लिएर उनी विभिन्न आफन्तको घरसम्म पुगेका थिए। तर नेगेटिभ रिपोर्ट आएको तीन दिनपछि अर्थात् मंगलबार काठमाडौं महानगरपालिकाका एक कर्मचारीले फोन गरेपछि उनको निर्धक्कता समाप्त भयो। स्वाब दिएपछि पहिलो रिपोर्ट नआउँदासम्म उनी एकान्तवास बसेका थिए। नेगेटिभ रिपोर्ट आएपछि उनले धेरै मानिस भेटिसकेका थिए।
‘जसको गल्ती भए पनि अब आइसोलेनमा बस्नुको विकल्प मसँग रहेन,’ सांसद बोगटीले भने, ‘मेरो कोठामा एकान्त बस्ने अवस्था नभएपछि अहिले कीर्तिपुरस्थित आयुर्वेद अस्पतालमा बनाइएको अस्थायी कोभिड अस्पतालमा छु।’
आफू संक्रमित भएपछि सम्पर्कमा आएका सवै व्यक्तिलाई परीक्षण गर्न उनले जानकारी गराएका छन्। महानगरका कर्मचारीलाई पनि उनले त्यसको जानकारी गराएका छन्। ‘आइसोलेसनमा बस्दा पनि आत्तिएको छैन,’ सांसद बोगटीले भने, ‘आफन्त र पार्टीका साथीहरुसँग फोनमा कुरा गरिरहेको छु, आत्मवल बलियो बनाएको छु पक्कै ठिक हुन्छ।’
कोरोनाले कुनै जात, पद नहेर्ने भएकोले सावधानी अपनाउन उनले अरुलाई आग्रह गरे। ‘चाहेर वा नचाहेर कसैलाई कोरोना हुने होइन, रोगले मान्छे चिन्दैन,’ उनले भने, ‘सावधानीचाहिँ अपनाऔं, सामाजिक दूरी कायम गरौं मास्क लगाऔं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
