डडेल्धुरा- डडेल्धुरामा सार्वजनिक रूपमा तीज र गौरा पर्व मनाउन रोक लगाइएको छ। जिल्ला स्तरीय कोभिड–१९ संकट व्यवस्थापन केन्द्रको बुधबार बसेको बैठकले सार्वजनिक रूपमा तीज र गौराजस्ता पर्व मनाउन रोक लगाउने निर्णय गरेको हो।
कोरोना भाइरस जोखिम न्यूनीकरणका लागि भीडभाड नहुने गरी चाडपर्व मनाउन आग्रह गर्दै केन्द्रले तीज, गौरा पर्वलगायतका अन्य धार्मिक साँस्कृतिक कार्यक्रमहरू सार्वजनिक रूपमा मनाउन निषेध गरिएको जानकारी दिएको हो।
नित्यपूजा र घरायसी पूजाबाहेक सामूहिक रूपमा गौरा र तीज जस्ता पर्व मनाउँदा कोरोनाको जोखिम बढ्ने भएकाले रोक लगाइएको हो। गौरा पर्व भदौ १० गते र तीज भदौ ५ गते परेको छ।
यस्तै बैठकले भदौ ४ गतेदेखि १२ गतेसम्म लागू हुने गरी जिल्लामा आंशिक लकडाउन गरिएको हो।
जिल्लामा संचालित अतिआश्यक सेवा तथा बस्तुहरु बिक्री वितरण गर्ने पसलहरूबाहेक सम्पूर्ण पसलहरू बिहीबारदेखि भदौ १२ गतेसम्मका लागि बिहान ५ बजेदेखि ९ बजेसम्म र बेलुका ५ बजेदेखि साँझ ७ बजेसम्म मात्रै संचालन गर्न पाउने छन्।
बजार क्षेत्रमा रहेको मानिसहरूको चहलपहल र भीडभाडलाई कम गर्न जिल्लामा संचातिल हुने मोटरसाइकलहरूलाई बिहीबारदेखि नै जोर–बिजोर प्रणाली लागू गरिने सहायक प्रमुख जिल्ला अधिकारी बाबुराम अर्यालले जानकारी दिए।
प्रशासनले सवारी पास वितरण यसअघि नै बन्द गरिसकेको छ। प्रशासनले एक जिल्लाबाट अर्को जिल्लामा जानका लागि वितरण गर्दै आएको सवारी पास साउन २९ देखि बन्द गरेको थियो।
निर्णयको उल्लंघन हुने क्रियाकलाप कसैबाट भए गरेमा संक्रामक रोग ऐन, २०२० तथा अन्य प्रचलित कानुन बमोजिम कारबाही गरिने प्रशासन कार्यालयले जनाएको छ।
स्वास्थ्य कार्यालय डडेल्धुराका अनुसार जिल्लामा कोरोना संक्रमितको संख्या ३०६ छ। तीमध्ये ३०२ संक्रमित डिस्चार्ज भएका छन्। जिल्लामा सक्रिय संक्रमितको संख्या ४ छ।
जिल्ला सदरमुकामको अमरगढी नगरपालिकामा २ र नवदुर्गा गाउँपालिकामा २ गरी ४ जना सक्रिय संक्रमित छन्। उनीहरुको स्वास्थ्य अवस्था सामन्य रहेको जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
