काठमाडौं– क्यारेवियन प्रिमियर लिग (सिपिएल) टि–२० क्रिकेट मंगलबारबाट सुरु हुँदा सन्दीप आबद्ध जमैका तलावाजले बुधबार राति आफ्नो पहिलो खेल खेल्दैछ। सिपिएल क्रिकेटमा जमैका कस्तो टिम हो?
रोभमन पावेलको कप्तानीमा जमैकाले आफ्नो पहिलो खेलमा सेन्ट लुसिया जौउक्ससँग बुधबार राति प्रतिस्पर्धा गर्दैछ। आफ्नो पहिलो खेलमा नै जित हात पार्दै सुखद सुरुवात गर्ने दाउमा रहेको जमैका टिम यो पटक कस्तो छ? के जमैका यो पटकको उपाधि दाबेदार टिम हो?
त्यसो त, यो पटक गत संस्करणको भन्दा पनि सन्तुलित टिमसँगै भरपर्दा खेलाडीको बाहुल्यता देखिन्छ। अग्रपंक्तिमा राम्रा खेलाडी, मिडिल अर्डर र फिनिसिङ लाइनमा राम्रा ब्याट्सम्यान छन्। बलिङतर्फ पनि उतिकै राम्रा बलर छन्। समग्रमा हेर्दा टिम सन्तुलित देखिन्छ।
सिपिएल खेल्न वेष्ट इन्डिज प्रस्थान गर्नुअघि सन्दीपको भनाइलाई सापट लिने हो भने पनि टिम बलियो छ र उपाधि जित्छ। त्यसबेला सन्दीपले भनेका थिए, ‘हाम्रो टिम निकै राम्रो छ यो पटक। उपाधि जित्छौं भन्ने छ।’
प्रतियोगितामा जमैका तलावाजसँगै बार्बेडोस् ट्रिडेन्ट्स, ट्रिनबागो नाइट राइडर्स, गुयाना अमेजन वारियर्स, सेन्ट लुसिया जौउक्स र सेन्ट किट्स एण्ड नेभिस प्याट्रिओट्स गरी ६ टिम छन्।
गत सिजन जमैका तलावाजको प्रदर्शन बिर्सन लायक थियो। पहिलो संस्करण २०१३ मा च्याम्पियन बनेको तलावाजले २०१६ मा पनि उपाधि जित्न सफल भयो। तर २०१९ को सिजनमा भने जमैका तलावाजले १० खेलमा मात्र दुई खेल जित्दै पुछारमा रहेर लिग सकाएको थियो। त्यही हारको बदला यो पटक ब्याजसहित उठाउने लक्ष्यमा जमैका तलावाज टिम छ।
जमैका टिममा नेपालका सन्दीप लामिछाने, न्युजिल्यान्डका ग्लेन फिलिप्स, अफगानिस्तानका मुजिब उर रहमान, पाकिस्तानका आसिफ अली, अमेरिकाका रियान परसाउद र क्यानाडाका निकोलस किर्टन गरी पाँच खेलाडी विदेशी छन्। जसमा सन्दीप, फिलिप्स, मुजिब र आसिफमात्रै अनुभवी र धेरै फ्रेन्चाइज लिग खेलेका विदेशी खेलाडी हुन्। त्यस्तै, टिममा कप्तान रोभमन पावेल, चाडविक वाल्टन, आन्द्रे रसेल, कार्लोस ब्रेथवेट, जेर्मन ब्लाकवोड, नक्रुमाह बोनर, फिडल इडवार्डस, रमाल लेविस, प्रिस्टोन म्याक्सविन, भिरसामी परमुल, ओशान ओमस रहेका छन्।
अलराउण्डरमाथि विश्वास
टप अर्डरमा राम्रा ब्याट्सम्यान छन् भने मध्यक्रममा उतिकै राम्रो देखिएको छ। त्यसमाथि पनि अलराउण्डरको भूमिका तलावाजका लागि यो पटक विशेष रहनेछ।
ओपनिङमा वाल्टन र फिलिप्स आउँदा मध्यक्रममा कप्तान रोभमन, ब्लाकवोड, आसिफजस्ता ब्याटसम्यान छन्। अलराउण्डरमा रसेल, कार्लोस ब्रेथवेट, नक्रुमाह, निकोलसजस्ता खेलाडी छन्।
यो पटक फिनिसिङ लाइन रसेल र कार्लोसले सम्हाल्ने छन्। इन्डियन प्रिमियिर लिग (आइपिएल) मा होस् या सिपिएलमा, सबै फ्रेन्चाइज लिगमा बलरलाई धरापमा पार्ने रसेलको ब्याटिङमा टिमले निकै विश्वास गरेको छ। रसेलको ब्याटिङमात्रै हैन, बलिङ पनि उतिकै किफायती छ। विपक्षी टिमलाई कार्लोसको ब्याटिङ पनि चमत्कारी सावित हुन सक्छ।
सन्दीपलाई मुजिबको साथ
छोटो समयमा सर्वाधिक चर्चामा रहेका स्पिनरमध्ये एक हुन् नेपालका सन्दीप लामिछाने। आइपिएलबाट अन्तर्राष्ट्रिय फ्रेन्चाइज लिगमा आफ्नो यात्रा थालेका उनले विश्वका सबै लिग खेलिसकेका छन्। यो अवधिमा उनको प्रदर्शन झनै निखारिएको छ।
सन्दीप टिमका लागि पहिलो रोजाइका स्पिनर हुन्। जमैकाले सन्दीपलाई साथ दिन अर्का युवा स्पिनर मुजिबलाई टिममा ल्याएको हो। सन्दीपले भन्दा टि–२० मा धेरै विकेट लिए पनि मुजिबको भन्दा खेल सन्दीपको राम्रो छ। मुजिबले १११ टि–२० खेलमा ११५ विकेट लिएका छन् भने सन्दीपले मात्र ७७ खेलमा १०५ विकेट लिएका छन्।
टि–२० अन्तर्राष्ट्रिय खेलमा भने मुजिबले भन्दा सन्दीपले दुई खेल बढी खेलेका छन्। मुजिबले १९ खेलबाट २५ विकेट लिँदा सन्दीपले २१ खेलबाट ३४ विकेट लिएका छन्।
जमैका तलावाजले यी दुवै स्पिनरलाई मैदानमा उतार्ने अधिक सम्भावना छ। किनभने टिममा रहेका अन्य स्पिनरमा अनुभवको कमीसँगै प्रदर्शन राम्रो छैन। रमाल लेविस र भिरासामी परमुल उत्कृष्ट स्पिनर होइनन्। टिमले यी दुई खेलाडीलाई सन्दीप र मुजिबको विकल्पकै लागि राखेको हो।
तिव्र गतिको बलिङमा फिडल इडवार्डस र ओशाने थोमसले थेग्नेछन्। त्यस्तै, अलराउण्डर रसेल र कार्लोसको बलिङले पनि टिमलाई जिततर्फ डोर्याउनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
