काठमाडौं- ७० जना स्वास्थ्यकर्मी नै कोरोना संक्रमित भएपछि ५ सय बेड क्षमताको नारायणी अस्पतालको उपचार सेवा प्रभावित भएको छ। संक्रमणको जोखिम तीव्र रूपमा बढेको र धेरै स्वास्थ्यकर्मी नै एकैपटक आइसोलेसनमा जानु परेकाले अस्पतालका आकस्मिक बाहेकका सबै सेवा बन्द गर्न बाध्य भएको अस्पतालका मेडिकल सुपरिटेन्डेन्ट (मेसु) डा मदनकुमार उपाध्यायले बताए।
‘अहिले हामीले इमर्जेन्सी बाहेकका सबै सेवा बन्द गरेका छौँ। अस्पतालमा भर्ना भएका बिरामीमा धेरैजसो कारोना पोजिटिभ देखिएको छ। हाम्रै अस्पतालका ७० कर्मचारीमा पनि कोरोना देखिएको छ,’ मेसु डा उपाध्यायले भने।
कोरोना संक्रमण पुष्टि हुनेमा १२ जना चिकित्सक, १० जना नर्स, पारमेडिक्स १५ जना, सहयोगी, प्रशासनका कर्मचारी, फार्मेसी, एक्स रे, ल्याबलगायतका कर्मचारी छन्। सबैजसो विभागका कर्मचारीहरुमा कोरोना देखिन थालेपछि अस्पतालका आकस्मिक बाहेकका सेवा बन्द गर्न बाध्य भएको अस्पतालले जनाएको छ।
बन्द रहेका सेवा सुरु गर्नुअघि अस्पतालले सबै चिकित्सक तथा कर्मचारीहरुको कोरोना परीक्षण गराउन स्वाब संकलन गरेको जनाएको छ। अन्य कर्मचारीहरुको रिपोर्टमा कोरोना पोजेटिभ देखिए बन्द सेवा तत्काल सञ्चालन गर्न सकिने अवस्था नरहेको मेसु उपाध्यायले भने।
आवश्यक जनशक्ति व्यवस्थापन गर्न नसक्दा उपचार सेवा प्रभावित भएको उनले बताए। यसका लागि स्वास्थ्य तथा जनसंख्या मन्त्रालयमा पटकपटक माग गर्दा पनि मन्त्रालयले हालसम्म कुनै प्रतिक्रिया नजनाएको गुनासो उनको छ।
‘जनशक्तिका लागि केन्द्र सरकारसँग हामीले पटक-पटक कुरा गर्यौं। स्वास्थ्य मन्त्रालयमा पत्राचार पनि गरिसकेका छौँ। तर अहिलेसम्म हामीले प्राप्त गर्न सकेका छैनौँ,’ मेसु डा उपाध्यायले भने।
संक्रमितको उपचार गर्न छुट्टै अस्पताल
स्वास्थ्यकर्मी नै कोरोना संक्रमित भएर थलिएको नारायणीले कोरोना संक्रमितको मात्र उपचार गर्ने गरी कोभिड-१९ विशेष अस्थायी अस्पताल चलाइरहेको छ। अस्पतालले कोरोना उपचारका लागि बेग्लै अस्पताल नै सेटअप गरेको अस्पतालका मेडिकल सुपरिटेन्डेन्ट (मेसु) डा मदनकुमार उपाध्यायले बताए।
कोरोना उपचारका लागि अस्पतालले ५० बेडको आइसोलेसन र १० बेडको आइसियू वार्ड सञ्चालनमा ल्याएको छ। बिरामीको चाप बढेको अवस्थामा ७० जनासम्मलाई भर्ना गरेर सेवा दिइरहेको अस्पतालका मेसु डा उपाध्यायले जानकारी दिए।
‘बिरामीको चाप बढेपछि ७० जनासम्म संक्रमितलाई एकैपटक हामीले सेवा दिइरहेका छौँ। त्योसँगसँगै हामीले थप २० बेडको आइसोलेसन सञ्चालन गरेका छौँ। त्यो आइसोलेसन भनेको चाहिँ सम्भावित संक्रमितका लागि हो। क्रिटिकल केसहरुको लागि ५ वटा बेडको लागि सेटअप गरेका छौँ,’ मेसु डा उपाध्यायले भने।
'अहिले अस्पतालको सबै ७० बेड भरिएका छन्। कोरोना संक्रमित नयाँ बिरामी भर्ना लिन सक्ने अवस्था छैन। १० जना आइसियुमा राखिएको छ भने ६० जना आइसोलेसन वार्डमा राखेर उपचार भइरहेको छ,' अस्पतालका अर्का एक जना कर्मचारीले भने, 'ओपिडी सेवा कहिले संचालनमा आउँछ भन्न सकिने अवस्था छैन। स्वास्थ्यकर्मी नै संक्रमित भएर आइसोलेसनमा गएपछि कर्मचारी अभाव उतिकै छ।'
३ सिफ्टमा २५ कर्मचारी
अस्पतालका अधिकांश कर्मचारीमा कोरोना देखिएपछि अस्पतालमा अहिले २० देखि २५ कर्मचारीहरु खटिएका छन्। अस्पतालले ३ वटा सिफ्टहरु (मर्निङ, डे र इभिनिङ) तय गरेको छ। प्रत्येक सिफ्टमा एकजना मेडिकल अधिकृत, ५ जना नर्स, एकजना फिजिसियन, एक जना क्रिटिकल केयर एक्सपर्टलाई खटाइएको छ। अस्पतालमै बसेर चिकित्सक, नर्स, प्रशासन, सहयोगी लगायत २५ जनाको टिमले समग्र उपचार व्यवस्थापन गरिरहेको अस्पतालले जनाएको छ।
कोरोना उपचार तथा अन्य रोगको इमर्जेन्सी उपचारका लागि छुट्टाछुट्टै अस्पताल भएकाले जोखिम कम गर्न मद्दत गरेको छ। तर पछिल्लो समय अधिकांश चिकित्सक तथा अन्य बिरामीहरुमा कोरोना देखिन थालेपछि थप सतर्क बन्नुपर्ने अवस्था रहेको मेसु डा उपाध्यायले बताए।
पछिल्लो समय चिकित्सक तथा अन्य कर्मचारीहरुमा कोरोना पोजिटिभ देखिन थालेपछि चेकजाँच गरेर रिपोर्ट नआउन्जेलसम्म डराउनुपर्ने अवस्था रहेको उनले जानकारी दिए।
अस्पतालमा आवश्यक सानातिना स्वास्थ्य सामग्रीको अभाव भएर कहिलेकाँही समस्या हुने गरेको अस्पतालले जनाएको छ। ‘अत्यावश्यक सामग्रीको अभाव भएर काम नै रोक्नुपरेको छैन। कहिलेकाँही सामान्य स्वास्थय सामग्रीको अभावमा हामीले समस्या झेल्नुपरेको अवस्था छ। तर हामीले त्यसलाई स्थानीय निकायबाटै जोहो गर्ने गरेका छौँ,’ डा उपाध्यायले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
