काठमाडौं-बाँकेको भेरी अस्पतालले प्रदेश सरकारको सहयोगमा नेपालगञ्जको सुशील कोइराला प्रखर क्यान्सर अस्पतालमा कोभिडका बिरामी व्यवस्थापन गरिरहेकोमा अब आफैंले कोभिड अस्पताल बनाउने तयारी गरेको छ। यो लेभल २ अस्पताल हो।
यसका लागि अस्पतालले ४० बेडको आइसोलेन सेन्टर, ४५ बेडको शंकास्पद बिरामी राख्ने र ५० बेडको पोजेटिभ बिरामी राख्ने संरचना तयार गरेको मेडिकल सुपरिटेन्डेन्ट डा प्रकाशबहादुर थापाले बताए।
उक्त सेन्टरमा पाँच वटा आइसीयु र ४५ वटा जनरल बेड रहने अस्पतालकी मेट्रोन दुर्गालक्ष्मी श्रेष्ठले बताइन्।
सुशील कोइराला क्यान्सर अस्पतालमा सञ्चालन गरिएको कोभिड अस्पताल विवादमा परेपछि भेरीले आफ्नै अस्पताल भवनमा कोभिड अस्पताल सञ्चालनमा ल्याउन लागेको हो।
‘कोभिड अस्पताल उता चलाउन गार्हो भएकाले यतै चलाउन खोजेका छौं,’ मेसु थापाले भने, ‘प्रदेश सरकारको सहयोगमा सबै कार्य भेरीले गरेको थियो तर त्यहाँ पनि क्यान्सरका बिरामी आउने र स्थान अभाव हुने गुनासोपछि यतै सार्ने तयारी गरिएको हो।’
सुशील कोइराला क्यान्सर अस्पतालमा ३३ जना कोरोनाका बिरामी छन्। जसमध्ये २ जना गम्भीर र एक जना लक्षण भएका बिरामी छन्। ‘२ जना फिजियसनले पालैपालो गरिरहनु भएको छ, ६ जना नर्स ड्युटीमा खटिनु भएको छ,’ मेट्रोन दुर्गालक्ष्मीले भनिन्, ‘दुईतिर चलाउन र जनशक्ति परिचालन गर्न समस्या भयो र दुवै अस्पतालका बीचमा केही कन्फ्युजन पनि भयो ।’
प्रदेश सरकारको सहयोगमा उक्त स्थानमा अस्पताल चलाएको तर क्यान्सरका बिरामी जोखिममा पर्ने गुनासो पनि आएपछि भेरीमै चलाइने मेसु थापाले बताए।
१ जना नर्समात्र संक्रमित
भेरी अस्पतालमा हालसम्म एकजना मात्र चिकित्सक संक्रमित छन्। संक्रमित नर्सलाई अस्पतालबाट नभई उनकै परिवारबाट संक्रमित भएको पुष्टि भएको अस्पतालले जनाएको छ। कोभिडको उपचारमा खटिएका नर्स तथा डाक्टरहरुसमेत संक्रमणबाट हालसम्म सुरक्षित रहेको मेट्रोन श्रेष्ठले बताइन्।
अस्पतालले आगामी दिनका लागि नयाँ रणनीतिका साथ उपचार गर्ने तयारी गरेको मेसु थापाले बताए।
अस्पतालले लक्षण देखिएकाहरुलाई बेडमा राख्ने र अन्यलाई सामान्य आइसोलेसनमा राख्ने, सम्भव भए होम आइसोलेसनमा राख्नेसम्मका योजना रहेको थापाले बताए।
‘भेन्टिलेटरमा राखेर उपचारै गर्नुपरे शंकास्पदलाई छुट्टै उपचार गर्छौं’, उनले भने, ‘सामान्य र लक्षण नभएका बिरामीलाई सामान्य बेडमा चिकित्सकहरुको निगरानीमा राख्ने छौं।’
जोखिम कति ?
सामान्य रोग र कोभिडको उपचार गर्ने अस्पताल एकै ठाउँमा हुँदा जोखिम धेरै हुने देखिएको छ। अस्पतालमा उपचार गर्न आउने मानिसहरु पनि डराउने गरेको अनुभव मेट्रोन श्रेष्ठको छ। ‘कोभिड विशेष अस्पतालमा फ्रन्टलाइनमा खटिने स्वास्थ्यकर्मी पहिलो जोखिममा छन्’ श्रेष्ठले भनिन्, ‘तर हामी डराएका छैनौं, सुरक्षित र स्वास्थ्य उपकरणको प्रयोग तथा पिपिईहरुको प्रयोग गरेर उपचार गरिरहेका छौं।’
अस्पतालले यी सबै सवाललाई ख्याल गरेर सामान्य उपचार गर्ने र कोभिड उपचार गर्ने अलग अस्पताल बनाएको उनले बताइन्।
‘दुवै अस्पतालका चिकित्सक र नर्सको टिम पनि अलग–अलग छ,’ उनले भनिन्, ‘एउटा अस्पतालका बिरामी अर्कोमा जान मिल्दैन।’ आवतजावत गर्ने बाटो पनि फरक–फरक बनाइएको उनले बताइन्।
मानिसहरु उपचारका लागि आउन डराउन थालेको तर अस्पतालले उनीहरुलाई मनोपरामर्शमार्फत् अस्पतालका बारेमा बुझाइरहेको उनले बताइन्। ‘हिजो सबै शंकास्पद बिरामी भएकाले जोखिम धेरै थियो,’ उनले भनिन्, ‘उक्त जोखिम त अहिले पनि छ, तर अब सबै सचेत भएकाले फरक परेको छ।’
कोभिड अस्पतालभन्दा ननकोभिड अस्पतालका स्वास्थ्यकर्मीलाई जोखिम धेरै देखिएको उनले बताइन्। ‘हामीले पिपिईदेखि कसरी सुरक्षित हुनेसम्मको तालिम दिएका छौं,’ उनले भनिन्, ‘यसले झन सहज भएको छ। कोभिडसँग डराएर हैन अभ्यस्त भएर काम गर्नुपर्ने भएको छ।’
कोभिड छ भनेर कसरी सचेत भएर काम गर्न सकिन्छ भनेर आफूहरुले काम गरिरहेको उनले बताइन्।
कसरी मिलाउँदै छ उपचारको तालिका?
अस्पतालमा उपचारका लागि आउने बिरामीको उपचारदेखि कोभिडका बिरामीलाई व्यवस्थापनसम्मका लागि अस्पतालले दैनिक तालिका बनाएको मेसु थापाले बताए।
‘अहिलको अवस्थामा स्वास्थ्यकर्मीलाई देखिएको छैन तर कुनै पनि समयमा देखिनसक्छ,’ मेसु थापाले भने, ‘यही कुरालाई ख्याल गर्दै ड्युटीको सिफ्ट मिलाउनेदेखि पिपिआई अनिवार्य गर्ने काम गरिएको छ।’ ननकोभिड र कोभिडका बिरामी हेर्ने फरक जनशक्तिको व्यवस्था गरिने उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
