काठमाडौं- उपत्यकालगायत देशभर नै कोरोना संक्रमणको जोखिम बढेसँगै संघीय संसदका समितिहरुको बैठक प्रभावित भएको छन। कोरोनाका कारण संघीय संसदका समितिहरुको बैठक प्रभावित हुँदा महत्वपूर्ण विधेयकहरु समितिमै अड्किएका छन्।
निरन्तर रुपमा बैठक सञ्चालन हुन नसक्दा राज्य संचालनका लागि आवश्यक नीति नियम निर्माणका काम प्रभावित छन्। महामारीको समयमा राहत वितरण तथा उद्धारका काम प्रभावकारी बनाउन सरकार र सम्बन्धित निकायलाई जिम्मेवार बनाउन निर्देशन दिने निकायको रुपमा रहेका समितिहरूको बैठक प्रभावित हुँदा समस्या देखिएको छ।
राष्ट्रियसभामा १० र प्रतिनिधिसभामा १० गरी दुवै सदनका समितिमा २० वटा विधेयक विचाराधीन रहेका छन्। सरकारको कार्य सञ्चालनमा महत्वपूर्ण र आवश्यक विधेयक समिति र दुवै सदनमा विचाराधीन रहेको संघीय संसद सचिवालयका सहायक प्रवक्ता दशरथ धमलाले बताए। 'कोरोना संक्रमण जोखिमको कारण अहिले संसदीय समितिहरूको बैठक नियमित सञ्चालन हुन सकेको छैन। कोरोना संक्रमणको जोखिमका कारण बैठक सुरु गर्न समस्या भएको छ,' उनले भने।
समितिमा अध्यागमन विधेयक, अनुगमन तथा मूल्याङ्कन विधेयक विचाराधीन अवस्थामा छन्। अनुगमन तथा मूल्याङ्कन विधेयक विचाराधीन रहँदा विकास निर्माणका काम कारबाही कसरी मूल्याङ्कन गर्ने, कसरी व्यवस्थित गर्ने भन्ने कुराहरु प्रभावित भएका छन। यस्तै तथ्याङ्क विधेयक पनि समितिमै विचाराधीन रहेको छ।
आगामी वर्ष (२०७८) मा सुरु हुने राष्ट्रिय जनगणनामा तथ्याङ्क कसरी संलकन गर्ने, कसरी व्यवस्थित गर्ने लगायतका प्रावधान विधेयकमा रहेका छन्। विधेयक विचाराधीन हुँदा ती कामहरु गर्न बाधा पुग्न सक्ने उनले बताए।
'नागरिक उड्डयन प्राधिकरण, नेपाल हवाई सेवा विधेयक, बिमासम्बन्धी विधेयक, बैंक तथा वित्तिय संस्थासम्बन्धी विधेयक, सार्वजनिक ऋण व्यवस्थापन सम्बन्धी र धितोपत्र ऐन सम्बन्धी लगायतका विधेयक समितिमा अड्किँदा सरकारका काम कारबाही प्रभावकारी ढंगले अगाडि बढाउन समस्या उत्पन्न हुन्छ,' सहायक प्रवक्ता धमलाले भने।
राष्ट्रियसभा र प्रतिनिधिसभामा भ्रष्टाचार र अख्तियार दुरुपयोग सम्बन्धि विधेयक, नागरिकता विधेयक, निजामति सेवा विधेयक लगायत महत्वपूर्ण विधेयकहरु विचाराधीन रहेका छन्। निजामति विधेयक पारित हुँदा प्रदेश निजामति सेवा बन्न सकेको छैन भने स्थानीय तहमा कर्मचारी भर्नाका काम पनि प्रभावित भएको उनको भनाइ छ।
संघीय संसद सुरु भएपछि १ सय २२ वटा विधेयक दर्ता भएका छन्। ६८ वटा विधेयक दुवै सदनबाट पारित भई राष्ट्रपतिबाट प्रमाणीकरण समेत भइसकेका छन्। १ विधेयक फिर्ता भएको छ। संसदको छैटौँ अधिवेशनको अन्त्यसम्म समितिमा २० र दुवै सदनमा १९ वटा विधेयक विचाराधीन रहेका।
प्रतिनिधिसभामा १५ र राष्ट्रियसभामा ३ वटा विधेयक विचाराधीन छन् भने, एउटा विधेयक प्रतिनिधिसभाबाट सन्देशसहित राष्ट्रियसभामा पठाएको भएपनि पेश हुन बाँकी छ। १३ वटा विधेयक दर्ता भएपनि प्रक्रियामा प्रवेश गरेका छैनन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।