.jpg)
नेपाल घुम्न आएका पर्यटकको फाइल तस्बिर।
काठमाडौं- नेपाल घुम्न आउने पर्यटकहरुका लागि सरकारले जारी गर्दै आएको अनअराइभल भिसा तत्कालका लागि जारी नगर्ने तयारी सरकारले गरेको छ। गृह मन्त्रालय, परराष्ट्र, स्वास्थ्य तथा जनसंख्या र संस्कृति, पर्यटन तथा नागरिक उड्डयन मन्त्रालयका सचिव र विभागीय प्रमुखहरूको बैठकले जारी नगर्न सरकारलाई सिफारिस गरेको हो।
बैठकमा गृह मन्त्रालयले तत्कालका लागि नेपाल आउने पर्यटक र गैरआवासीय नेपालीलाई जारी गरिँदै आएको अनअराइभल भिसामा रोक लगाउने प्रस्ताव गरेको थियो। कोरोना भाइरसको संक्रमण बढेको भन्दै गृहले तत्कालका लागि यो प्रक्रिया रोक्न प्रस्ताव गरेको बैठकमा सहभागी एक कर्मचारीले नेपाल लाइभलाई बताए।
'बैठकले तत्कालका लागि अनअराइभल भिसा जारी गर्न रोक्ने निर्णय गरेको छ। यसमा छलफलमा सहभागी सबै मन्त्रालयका सचिव र विभागीय प्रमुखहरूले सहमति जनाउनुभएको छ,' छलफलमा सहभागी भएका ती कर्मचारीले भने।
यसअघि सरकारले भदौ १ गतेदेखि दैनिक १२ वटा अन्तर्राष्ट्रिय उडानबाट हवाइ सेवा शुरु गर्ने तयारी गरेको थियो। तर आजै पर्यटन मन्त्रालयले नेपाल नागरिक उड्डयन प्राधिकरण लगायत सरोकारवाला निकायका प्रतिनिधिसँग गरेको छलफलले भदौ १६ बाट मात्र आन्तरिक तथा बाह्य उडान सेवा शुरु गर्ने गरी समन्वय गर्न पर्यटन मन्त्रालयलाई जिम्मेवारी दिएको छ।
सरकारले सन् २०२० का लागि तोकेको भिजिट २०२० पनि कोरोना संक्रमणकै कारण स्थगित गरेको थियो। संक्रमण थप बढ्दै गएको भन्दै अब पछिल्लो समय अनअराइभल भिसासमेत रोकिने भएको छ। विदेशी पर्यटकले नेपालमै आएर भिसा लगाउन पाउने व्यवस्था अनअराइभल भिसा हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
