काठमाडौं– काेराेना संक्रमितको संख्या वृद्धि भएपछि सुनसरी जिल्ला प्रशासनले आवागमनमा रोक लगाएको छ। बुधबार रातिदेखि पाँच दिनसम्मका लागि निषेधाज्ञा जारी गरेको प्रशासनले जनाएको छ।
बुधबार मध्यरातबाट लागू भएको निषेधाज्ञा साउन २६ को मध्यरातसम्म रहने जनाइएको छ। अत्यावश्यक सेवाका सवारीसाधन, ढुवानीका साधन तथा निर्माण सामग्री बोकेका सवारीसाधन बाहेकका सबै सवारी साधनमा रोक लगाएको प्रशासनले जनाएको छ।
बस, सिटि सफारी, ट्रक, कार, जिप, टेम्पो, म्याजिक माइक्रोलगायतका सवारीसाधान रोक्ने प्रशासनले जानकारी गराएको छ। दुहबी, इटहरी, बराहक्षेत्र, ईनरुवालगायतका बजार क्षेत्रमा स्वाब परीक्षणमा वृद्धिसँगै संक्रमितको संख्या बढेको थियो।
निषेधाज्ञाको अवधिमा सरकारी तथा सार्वजनिक संस्थाका कर्मचारीका लागि सवारी सञ्चालनको अनुमति दिइएको छ। अत्यावश्यक सेवाका कर्मचारीले आफ्नो कार्यालयको काममा कार्यालयको समय अघि र पछि समेत हिंडडुल गर्न पाउने बताइएको छ।
औद्योगिक क्षेत्रको हकमा सम्बन्धित उद्योग प्रतिष्ठानहरुले स्वास्थ्य प्रोटोकल पालना गरी उद्योग सञ्चालन गर्न पाउने व्यवस्था गरिएको छ। उत्पादित वस्तु बजारमा पुर्याउन र उद्योगमा प्रयोग हुने कच्चा पदार्थ ल्याउन अनुमति दिइएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।