काठमाडौं- संघीय मामिला तथा सामान्य प्रशासन मन्त्रालयले काठमाडौंका बुढानीलकण्ठ र दक्षिणकाली नगरपालिकाले चालु आर्थिक वर्षको बजेट प्रविष्ट नगरेको जनाएको छ।
काठमाडौंका यी दुई नगरपालिकाले बजेट प्रविष्ट नगरेको भन्दै संघीय मामिलाले विवरण पठाउन ताकेता पनि गरेको छ। दुवै नगरपालिकाले बजेट ल्याएको भएपनि विवरण प्रविष्ट गर्न केही ढिला भएको स्वीकार गरेका छन्।
बुढानीलकण्ठ नगरपालिकाका प्रवक्ता नवराज भट्टराईले बजेट प्रस्तुत भएपनि विवरण पठाउन केही ढिला भएको बताए। 'हामीले १ अर्ब ६७ करोड रुपैयाँको बजेट ल्याएका छौँ, त्यसका विभिन्न विवरण संघीय मन्त्रालयले नपाएको हुनाले ताकेता गरेको हुन सक्छ,' उनले भने।
असार १० गते नगरसभा सुरु भएको र त्यही दिन नीति तथा कार्यक्रम प्रस्तुत भई २४ गते बजेट पास गरिएको नगरपालिकाले जनाएको छ।
यसैगरी दक्षिणकाली नगरपालिकाकी उपमेयर बसन्ती तामाङ (डंगोल)ले पनि असार १० गते नै बजेट ल्याइसकेको भएपनि विवरण बुझाउन केही ढिला भएको बताइन्। 'हाम्रो नगरपालिकाले ७५ करोडको बजेट ल्याएको छ,' उनले भनिन्, 'केही विवरण जान बाँकी होला, त्यो पनि अब केही दिनमा नै पठाउँछौँ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
