काठमाडौं- अधिकांश जनस्वास्थ्यविद्हरूले देशभर एकैपटक लकडाउन नगर्न र जनस्वास्थ्य मापदण्ड कार्यान्वयन गर्न सुझाव दिएका छन्। प्रधानमन्त्री केपी ओलीले सरकारी निवास बालुवाटारमा लकडाउनका विषयमा जनस्वास्थ्यविद्सँग परामर्शका क्रममा जनस्वास्थ्यविद्हरूले सुरक्षाका मापदण्ड कडाइका साथ पालना गराउनुपर्ने सुझाव दिएका हुन्।
'लकडाउन नगर्न र सुरक्षाका उपाय पालना गर्दै परीक्षण गर्न अधिकांश सहभागीहरूले सुझाव दिएका छन्,' छलफलमा सहभागी एक जनस्वास्थ्यविद्ले भने।
तर छलफलको अन्त्यमा प्रधानमन्त्रीले कुनै पनि निर्णय नसुनाएको ती जनस्वास्थ्यविद्को भनाइ छ। सामाजिक दूरी कायम गर्न र मास्कको प्रयोगलाई बढाउन गराउन सहभागीले धारणा राखेका थिए। विदेशबाट आउनेहरूको अनिवार्य पिसिआर परीक्षण गर्नसमेत स्वास्थ्यविद्हरूले धारणा राखेका थिए। यसका साथै स्वास्थ्य क्षेत्रका तयारी तीव्र पार्न र अस्पतालहरूमा आइसियू र भेन्टिलेटरको संख्या समेत बढाउनुपर्ने उल्लेख गरेका थिए।
छलफलमा सहभागी केही जनस्वास्थ्यविद्हरूले भने संक्रमणको जोखिम उच्च रहेका स्थानमा भने ती स्थानमा मात्र लकडाउन वा निषेधाज्ञा जारी गर्न सकिने धारणा राखेका थिए। तर देशैभर एकैपटक नभएर स्थानविशेषमा मात्र निषेधाज्ञा जारी गर्न सुझाव दिएका थिए। सार्वजनिक सवारी साधनमा पनि पूर्ण रूपमा लागू गराउन स्वास्थ्यविद्हरूले आग्रह गरेका थिए।
कोरोना संक्रमितको संख्या बढ्दै गएपछि ओलीले जनस्वास्थ्यविद्सहित विभिन्न स्वास्थ्य क्षेत्रका २५ जनालाई बोलाएर परामर्श सुरु गरेका थिए। छलफलमा प्रमुख प्रतिपक्षी नेपाली कांग्रेसका सभापति शेरबहादुर देउवा, जनता समाजवादी पार्टीका अध्यक्ष महन्थ ठाकुरलगायतका नेताहरु पनि सहभागी थिए।
काठमाडौं उपत्यकालगायत तराई क्षेत्रमा कोरोना संक्रमितको संख्या बढ्न थालेपछि प्रधानमन्त्री ओलीले छलफल गर्न स्वास्थ्य क्षेत्रका व्यक्तिहरुलाई बोलाएका हुन्। यसअघि प्रधानमन्त्री ओलीले गत जेठ २१ गते पनि स्वास्थ्य क्षेत्रका प्रतिनिधिसँग छलफल गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
