काठमाडौं– नेपाली कांग्रेसको भ्रातृ संस्थाको सम्बन्धमा बनेको विधानले केन्द्रीय समितिमा रहेका व्यक्ति भ्रातृ संस्थाको पदाधिकारी बन्न नपाउने व्यवस्था गरेको छ। संशोधित विधानको परिच्छेद ११ मा रहेको दफा ४२ को ‘ङ’मा पार्टीको कुनै तहमा निर्वाचित तथा मनोनित भए भ्रातृ संस्थाको पद स्वतः रिक्त हुने व्यवस्था छ।
‘पार्टीको कुनै पनि तहको पदाधिकारी वा सदस्य भ्रातृ संघको पदाधिकारी वा सदस्य हुने छैन। भ्रातृ संघको कार्यसमितिका पदाधिकारी वा सदस्य पार्टीको कुनै पनि तहको कार्यसमितिमा निर्वाचित वा मनोनित भएमा निजको भ्रातृ संघको पद स्वतः रिक्त हुनेछ,’ विधानमा भनिएकाे छ।
विधानको उक्त व्यवस्थाविपरीत केन्द्रीय समितिमा रहेका चार जनाले भ्रातृ संस्थाको पदीय जिम्मेवारी छाडेका छैनन्। केन्द्रीय सदस्यद्वय मीनबहादुर विश्वकर्मा र लक्ष्मी परियार दलित संघको उपल्लो तहमा छन्। विश्वकर्मा दलित संघको अध्यक्ष हुन् भने परियार महासचिव हुन्।
पार्टी सभापति शेरबहादुर देउवाले आमन्त्रित केन्द्रीय सदस्यमा मनोनित गरेका आनन्द बिष्ट र बालकृष्ण पाण्डेयले पनि भ्रातृ संस्थाको जिम्मेवारी छाडेका छैनन्। विष्ट अमेरिकास्थित जनसम्पर्क समितिको अध्यक्ष छन् भने पाण्डेय जनसम्पर्क समिति भारतको अध्यक्ष छन्।
विधानको व्यवस्था लागू नभएपछि उक्त विषयप्रति वरिष्ठ नेता रामचन्द्र पौडेल पक्षले विरोध जनाएको छ। अमेरिका र भारतका जनसम्पर्क समितिका अध्यक्षद्व विष्ट र पाण्डेयले केन्द्रीय समितिमा जिम्मेवारी पाए पनि भ्रातृ संस्थाको पद नछाडेको प्रति वरिष्ठ नेता पौडेलले आपत्ति जनाए। पौडेल पक्षका शीर्ष तहका नेताहरुले पत्रकार सम्मेलन नै गरेर विधान कार्यान्वयन नभएकोप्रति प्रश्न उठाएका थिए। देउवानिकट भएकै आधारमा दोहोरो जिम्मेवारीमा रहने अवस्था रहेको पौडेल पक्षको आरोप छ।
२०६९ सालमा अधिवेशन भएको दलित संघको कार्यकाल २०७२ सालमै सकिएको हो। संघको अध्यक्षमा देउवानिकट मीनबहादुर विश्वकर्मा छन्। महासचिव लक्ष्मी परियारसमेत देउवानिकट नै हुन्। नियमित महाधिवशेन गर्न नसकेका विश्वकर्माले सभापति देउवाकै आडमा दोहोरो भूमिका रहन पाएको आरोप लागेको छ। विश्वकर्मा र परियार केन्द्रीय सदस्यसमेत रहे पनि दलित संघको पदीय जिम्मेवारी नछाडेकोप्रति नेता प्रकाशमान सिंहले आपत्ति जनाए। सभापति देउवा पक्षधर भएर नै उनीहरुले पद छोड्न नपरेको सिंहले नेपाल लाइभलाई बताए।
अघिल्लो विधानको व्यवस्थाअनुसार दोहोरो जिम्मेवारीको भूमिकामा रहेको दलित संघका अध्यक्ष विश्वकर्माले जानकारी गराए। ‘पहिलो विधानमा दोहोरो भूमिका लिन नपाउने व्यवस्था थिएन। भ्रातृ संस्थाको आगामी अधिवेशनबाट लागू हुने हो।’ विश्वकर्माले भने, ‘कांग्रेसको केन्द्रीय सदस्य अब भ्रातृ संस्थामा चुनाव लड्न पाउँदैन। जतिबेला म अध्यक्षका लागि लडेको थिएँ। त्यो बेला पाइने थियो।’
पछिल्लो समय नौ भ्रातृ संस्थाको पदावधि एक वर्ष थप्न पौडेल र अर्का नेता कृष्णप्रसाद सिटौलाको प्रस्ताव आएको उनले बताए। विधानको व्यवस्थाले एक वर्ष थप्न नमिल्ने भएसँगै छ महिनामात्रै थपिएको विश्वकर्माले जानकारी गराए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
