काठमाडौं- इटालियन सिरि ए फुटबल च्याम्पियन युभेन्टसले हारबाट लिगको अन्त्य गरेको छ। शनिबार राति भएको खेलमा घरेलु टिम युभेन्टस रोमासँग ३-१ गोलले पराजित भएको हो।
दुई खेल अघि नै उपाधि जितेको युभेन्टसले अन्तिम खेलमा आफ्ना दोस्रो रोजाइका खेलाडीलाई प्राथमिकता दिएको थियो। तर दोस्रो रोजाइको खेलाडीले युभेन्टसका लागि सोचेअनुसारको नतिजा नदिँदा २०१८ को अप्रिल महिनापछि पहिलो पटक युभेन्टस आफ्नै घरेलु मैदानमा हार्न पुग्यो।
क्रिष्टियानो रोनाल्डो र पाउल डिबाला जस्ता खेलाडीलाई बाहिर राख्दै खेलाइएको युभेन्टसले खेलको पाँचौ मिनेटमा नै गोल गर्न सफल भएको थियो। गोन्जालो हिगुइनले गोल गर्दै युभेन्टसलाई सुरुवाती अग्रता दिलाए। तर यो अग्रता लामो समयसम्म टिक्न सकेन। खेलको २३औं मिनेटमा निकोला कालिनिकले गोल गर्दै रोमालाई १-१ गोलको बराबरी दिलाए।
खेलको ४४औं मिनेटमा डिएगो पिरोटीले गोल गर्दै रोमालाई पहिलो हाफसम्म २-१ गोलको अग्रता दिलाए। खेलको ५२औं मिनेटमा उनले अर्को गोल गर्दा युभेन्टसविरुद्ध ३-१ गोलको जित निकालेको हो।
शनिबार राति नै भएको खेलमा इन्टर मिलानले एटलान्टालाई २-० गोलअन्तरले पराजित गरेको छ। त्यस्तै, लाजियोलाई नापोलीलाई ३-१ गोलअन्तरले पराजित गर्दा एसी मिलानले काग्लियारीलाई ३-० गोलअन्तरले पराजित गरेको छ।
हारसँगै युभेन्टसले ३८ खेलबाट ८३ अंक बनाउँदै लिग सकाएको छ। यता, दोस्रो स्थानमा रहेको इन्टर मिलानको ३८ खेलबाट ८२ अंक हुँदा एटलान्टाले ७८ अंक बनाएर लिग तेस्रो हुँदै सकाएको छ। लाजियो ७८ अंक बनाउँदै चौथो स्थानमा लिग सकाउँदा पाँचौ स्थानमा रहेको रोमाले ७० अंकमा लिग टुंग्यायो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787397239.png)
-1786602170.png)
-1786513116.png)
