काठमाडाैं- नेकपाका अध्यक्ष पुष्पकमल दाहाल 'प्रचण्ड'ले पार्टीभित्रका गतिविधिले सर्वत्र चिन्ता पैदा गरेकाे बताएका छन्। पार्टीभित्रका बहस स्वस्थ हुन नसक्दा चिन्ता पैदा भएकाे उनकाे भनाई छ।
कम्युनिष्ट नेता तुलसीलाल अमात्यको २३औँ स्मृति दिवसका अवसरमा शनिबार काठमाडाैंमा आयाेजित कार्यक्रममा प्रचण्डले पार्टीभित्रकाे बहसले एकतालाई थप मजबुत र सुदृढ बनाउने बताए। अध्यक्ष प्रचण्डले पार्टीमा पदका लागि नभएर विधि र पद्धतिका लागि बहस भइरहेकाे बताए।
उनले भने, 'पार्टी एकता भएकाे तीन वर्ष पुग्दा नपुग्दै याे पार्टी एकताबद्ध भई राख्ला या राख्दैन, के हुन्छ याे पार्टीकाे भविष्य? भन्ने प्रश्न हामी सबैकाे मनमा उब्जेकाे छ।' अध्यक्ष प्रचण्डले पार्टी एकता भएदेखि नै याे टुटाेस् भनेर सराप्न थालेकाे बताए। उनले कम्युनिस्टसँग जनताकाे धेरै नै भराेसा गरेकाे बताएका छन्। उनले जनता र कार्यकर्ताका कारण सबै षडयन्त्र छिचाेल्दै आएकाे बताए।
उनले पदका लागि विवाद भइरहेकाे भन्ने भ्रममा नपर्न आग्रह गरे। उनले पदकाे लागि झिनाझम्टी नभएर पार्टीकाे विधि र पद्धतिका बारेमा बहस भएकाे उल्लेख गरे। उनले अहिले पनि यही विषयमा छलफल भइरहेकाे बताए। पार्टीभित्र अस्वस्थ बहस भएकै कारण नकारात्मक प्रभाव पर्दै गएकाे प्रचण्डकाे भनाइ छ।
कम्युनिस्टहरु पदकाे लागि छिनाझप्टि गरेका छन् भन्ने भ्रममा नपर्न उनले सबैमा आग्रह गरे। एकताकाे बेला पनि आफूले पदलाई प्रथमिकतामा नराखेकाे उनकाे भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
