काठमाडौं-दरबारमार्गबाट साढे १४ किलो नक्कली र आधा किलो सक्कली सुन बरामद प्रकरणको अनुसन्धानका क्रममा प्रहरीले थप १ किलो नक्कली सुन बरामद गरेको छ।
थप १ किलो नक्कली सुन प्रहरी जवान बहादुर कडायतका साथी उमेश श्रेष्ठको बागबजारस्थित डेरामा लुकाएर राखेको अवस्थामा भेटिएको महानगरीय प्रहरी परिसर काठमाडौंका प्रमुख एसएसपी श्यामलाल ज्ञवालीले जानकारी दिए। श्रेष्ठले नै सुन आउँदैछ भनेर प्रहरीलाई सुराकी दिएका थिए।
कडायत महानगरीय प्रहरी वृत्त दरबारमार्गकै प्रहरी जवान हुन्। सुन तस्करीको सूचना सबैभन्दा पहिला कडायत र उनका साथी प्रसन्न श्रेष्ठलाई आएको थियो।
प्रहरीले गरेको अनुसन्धानका क्रममा उनीहरू दुवै जनाको मिलेमतोमा सुन लुकाएको पाइएको हो। उक्त सुन कमलादी हुँदै घण्टाघर, सिंहदरबार, माइतिघर, थापाथली, त्रिपुरेश्वर हुँदै सुन्धारा ल्याइएको अनुसन्धानले देखाएको छ।
दरबारमार्गबाट बरामद गरिएको भनिएको १५ किलो सुनमध्ये साढे १४ किलो नक्कली र आधा किलो सक्कली भएको पाइएपछि प्रहरीले अनुसन्धान सुरु गरेको थियो। त्यसक्रममा उक्त नक्कली सुन न्युरोडमै बनाएको खुलेको छ। न्युरोडका कालिगढलाई केही पैसा दिएर पहेंलो लेप लगाइएको पाइएपछि प्रहरीले कालिगढलाई सोधपुछ गरी कागज गराएर छाडेको छ।
नक्कली सुन बरामद प्रकरणमा महानगरीय प्रहरी वृत्त दरबारमार्गका डिएसपी रञ्जन दाहाललाई प्रहरी प्रधान कार्यालयले जिम्मेवारीबाट हटाउँदै प्रहरी प्रशिक्षण प्रतिष्ठान महाराजगञ्ज तानिसकेको छ।
यस्तै, यस प्रकरणमा प्रयोग भएको बा ६ च ५५१९ नम्बरको स्कोर्पियो गाडी ललितपुरको नखिपोटबाट बरामद भएको छ भने घटनामा संलग्न भएको आशंकामा चार जना पक्राउ परिसकेका छन्।
पक्राउ पर्नेमा निशेश सखिया, देवान पटेल‚ विजय पटेल र सन्दीप गुरुङ छन्। गुरुङ ट्याक्सी चालक हुन् भने बाँकी तीन जना नक्कली सुन ओसारपसार तथा बेचबिखनमा संलग्न रहेका भारतीय नागरिक रहेको प्रहरीले बताएको छ। सुन फालेर भागेपछि उनीहरू तीन जना गुरुङको ट्याक्सीमार्फत पूर्वनवलपरासी हुँदै भारत प्रवेश गर्न लागेका थिए।
महानगरीय प्रहरी वृत्त दरबारमार्गले गत मंगलबार बरामद गरेको साढे १४ किलो नक्कली तथा आधा किलो सक्कली सुनसँगै दुईवटा चाइनिज पेस्तोल पनि बरामद गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766152266.png)
-1764146706.png)
-1763721444.png)
