काठमाडौं- सर्वोच्च अदालतले राष्ट्रिय खेलकुद परिषद् (राखेप)को सदस्यसचिव भएका रमेशकुमार सिलवालको नियुक्तिमा प्रश्न उठाएको छ। न्यायाधीश आनन्दमोहन भट्टराईको इजलाशले सिलवाललाई नियुक्ति गर्ने मन्त्रिपरिषदको निर्णय बदर गर्न माग गरी दायर रिटमा कारण देखाउ आदेश जारी गरेको हो।
पूर्वखेलाडी तथा प्रशिक्षक सिन्धुलीका टीकादत्त दाहालले राखेपसमेतलाई विपक्षी बनाउँदै रिट दायर गरेका थिए। साउन ८ गते नै दाहालले सिलवाललाई नियुक्ति गर्न नमिल्ने जिकिरसहित रिट दायर गरेका थिए। उक्त रिटमा भट्टराईको एकल इजलासले मंगलबार लिखित जवाफ १५ दिनभित्र पेश गर्न आदेश गरेको हो।
सर्वोच्चले सिलवाललाई नै नियुक्त गर्नुपर्ने कारण पेश गर्न भनेको छ। सर्वोच्चले महान्यायाधीवक्ता कार्यालयमार्फत् जवाफ दिन भनेको छ।
निवेदक दाहालले देशभरका मानिसले थाहा नपाउने गरी मन्त्रालयको वेबसाइटमा ७ दिने सूचना जारी गरेको, अन्य सञ्चारमाध्यममार्फत् सूचना नदिएर प्रक्रिया मिचेको तथा सूचना मन्त्रालयको लेटरप्याडमा जारी गरिनु कानुनविपरीत भएको दाबी गरेका थिए।
सर्वोच्चले सिलवालको नियुक्तीका बारेमा प्रधानमन्त्री तथा मन्त्रिपरिषदको कार्यालय, युवा तथा खेलकुद मन्त्रालयलगायतसँग जवाफ माग गरेको छ।
राखेप र सदस्यसचिव नियुक्ति सिफारिस समितिलाई विपक्षी बनाई उनले रिट दायर गरेका थिए। दाहालले आफू पनि सो पदको लागि योग्य रहेको तर सूचना नपाउँदा आवेदन दिन नपाएको तथा देशभरका मानिसले थाहा नपाउनेगरी मन्त्रालयको वेबसाइटमा ७ दिने सूचना जारी गरेको दाबी रिटमा गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
