काठमाडौं– राष्ट्रिय खेलकुद परिषद् (राखेप) को सदस्यसचिवमा रमेश कुमार सिलवाल नियुक्त भएका छन्। सोमबार बसेको मन्त्रिपरिषदको बैठकले सिलवाललाई आगामी चार वर्षको लागि राखेप सदस्यसचिवमा नियुक्त गरेको हो।
आवेदन दिएका २७ जनामध्ये सिफारिस समितिले दिएको तीन जनाबाट निवर्तमान सदस्यसचिव सिलवाललाई मन्त्रिपरिषदले पुनः राखेपको बागडोर सम्हाल्न दिएको एक मन्त्रीले नेपाल लाइभलाई जानकारी दिए।
सिफारिस समितिले सिलवालसँगै लिलबहादुर थापा मगर र अन्जु श्रेष्ठको नाम युवा तथा खेलकुद मन्त्रालय पठाएको थियो। युवा तथा खेलकुद मन्त्रालयका सचिव रामप्रसाद थपलियाको संयोजकत्वमा रिमबहादुर रानाभाट र इन्दिरा निरौला सदस्य रहेको सिफारिस समितिले आवेदन दिनेमध्येबाट एक महिलासहित तीन जनाको नाम मन्त्रालयमा पेस गरेको थियो।
आफ्नो कार्यकालमा १३औँ दक्षिण एसियाली खेलकुद आयोजना सफलतापूर्वक सम्पन्न गरेको जस सिलवालले लिँदै आएका छन्।
‘राष्ट्रिय खेलकुद विकास ऐन, २०७७’ लागू भएसँगै रिक्त रहेको सदस्यसचिव पदका लागि पहिलो पटक खुला आवेदनबाट राखेपको सदस्यसचिव छानिएको हो।
सदस्यसचिवमा सिलवालसँगै राखेप उपाध्यक्षमा शिव कोइरालालाई समेत नियुक्त गरिएको छ। कोइरालाले १३औं सागमा प्रचारप्रसार विभाग संयोजक भएर काम गरेका थिए।
सदस्यसचिवमा आवेदन दिनेहरुले संक्षिप्त कार्ययोजनाको साथमा नेपाली नागरिकताको प्रतिलिपी, नेपाल सरकारबाट मान्यताप्राप्त विश्वविद्यालयबाट कम्तीमा स्नातक तह उतीर्ण प्रमाणपत्रको प्रतिलिपी र खेलकुद क्षेत्रमा कम्तिमा पाँच वर्ष काम गरेको अनुभवको प्रतिलिपी पेश गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
