काठमाडौं- बाढी पहिरोका कारण निर्माणाधीन २ ठूला आयोजनामा पुगेको क्षतिको विवरण अझै संकलन हुन सकेको छैन। १ सय २ मेगावाट उत्पादन क्षमताको मध्य भोटेकोशी जलविद्युत आयोजना र १ सय ११ मेगावाट उत्पादन क्षमताको रसुवागढी जलविद्युत आयोजनामा बाढी पहिरोले क्षति पुर्याएको थियो।
रसुवागढी जलविद्युत आयोजनामा गत असार ६ गते बाढी पसेको थियो भने असार २४ गते आएको बाढीले मध्य भोटेकोशी जलविद्युत आयोजनामा ठूलो क्षति पुर्याएको थियो। तर यी दुई आयोजनामा कति बराबरको क्षति भयो भन्ने आंकलन भने अझै भइसकेको छैन।
मध्यभोटेकोशी जलविद्युत आयोजना प्रमुख सुनिल कुमार लामाका अनुसार ठेकेदार कम्पनी अझै आयोजनास्थलमा आइनपुग्दा बाढी पहिरोका कारण आयोजनामा भएको क्षतिको आंकलन गर्न सकिएको छैन। ‘क्षतिको यकीन लेखाजोखा भइसकेको छैन। ठेकेदार कम्पनी पनि अहिले आयोजनास्थलमा छैन। उसलाई हामीले काममा फर्कन तारन्तार भनिरहेका छौं।’ आयोजना प्रमुख लामाले भने।
बाढी पहिरोका कारण मध्यभोटेकोशी जलविद्युत आयोजना पावर हाउसभित्र लेदो भरिएको थियो। त्यस्तै आयोजनाका इलेक्ट्रोमेकानिकल सामग्रीहरु बगाएको थियो भने सामान राखेको गोदाम पनि पुरिएको थियो।
त्यस्तै रसुवागढी जलविद्युत आयोजना प्रमुख छवि गैरेका अनुसार अघिल्लो वर्षको तुलनामा यस वर्षको बाढीले कम क्षति पुर्याएको भएपनि क्षतिको यकिन आंकलन भने भइसकेको छैन। ‘गतवर्षको जस्तो यसवर्षको बाढीले धेरै क्षति पुर्याएन। केही सामग्री बगेको हो। कफर ड्यामलगायत केही अस्थायी संरचना बगाएको हो’ उनले भने। बाढीले हेडवर्क्समा प्रयोग हुने डण्डी, सिमेन्ट, फर्मा, पानी तान्ने पम्प मेसिनलगायत सामग्री बगाएको थियो।
यो आयोजनामा बाढीले प्रत्यक्ष रुपमा ठूलो भौतिक क्षति नपुर्याए पनि नदीले बहन मार्ग परिवर्तन गरेका कारण समस्या सिर्जना भएको छ। पुलमा क्षति नभएपनि नदी आफ्नो बहनमार्गभन्दा बाहिर जाँदा आयोजनाको पहुँच मार्ग बन्द भएको छ। गत वर्ष पनि रसुवागढी आयोजनामा बाढी पहिरोले क्षति पुर्याएपछि आयोजनाको काम लम्बिएको थियो। यसवर्ष फेरि बाढी आएपछि आयोजनाको काम लक्षित समयभित्र सम्पन्न भइसक्नेमा चुनौती थपिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788743318.webp)
-1786602170.png)
-1786513116.png)
-1788425345.png)
