काठमाडौं- नेपाल उद्योग वाणिज्य महासंघको साधारणसभा फेरि अनिश्चित बनेको छ। सरकारले लकडाउन अन्त्य गरे पनि सभासम्मेलन गर्न रोक लगाएका कारण साउन अन्तिम साताका लागि तय भएको महासंघको साधारणसभा स्थगित भएको हो। महासंघको बिहीबार बसेको पदाधिकारी तथा पूर्वअध्यक्षहरूको बैठकले सरकारले सभा सम्मेलन गर्न छुट दिएको १५ दिनभित्र साधारणसभा गर्ने गरी नेपाल उद्योग वाणिज्य महासंघको ५४औं साधारणसभा स्थगित भएको छ।
योसँगै महासंघको ५४औं साधारण सभा तेस्रो पटकको लागि तोकिएको मितिमा नहुने भएको हो। यसअघि साउन २६ र २७ गते साधारण सभा गर्नेगरी मिति तय भएको थियो। तर सरकारले लकडाउन अन्त्यको घोषणा गरेपनि सभा सम्मेलन गर्न रोक लगाएको अवस्थालाई मध्यनजर गर्दै महासंघको साधारणसभा स्थगित गरिएको एक पदाधिकारीले जानकारी दिए।
यससँगै अब महासंघको साधारणसभा र नेतृत्व हस्तान्तरण कहिले हुन्छ अनिश्चय बढेको छ।
‘सरकारले अन्य क्षेत्र खुला गरे पनि सभा सम्मेलन नगर्न भनेको छ, त्यसकारण साउन २६ र २७ गतेका लागि तय भएको साधारणसभा तोकिएको समयमा नहुने निर्णय भएको छ,’ महासंघ स्रोतले भन्यो‚ ‘अहिलेको अवस्था निकै लामो समयसम्म लम्बिए अर्को विकल्पमा छलफल गर्ने समझदारी भएको छ।’
महासंघको ५४औं साधारण सभा चैत २८ र २९ गते तय भएको थियो। तर सरकारले लकडाउन जारी गरेसँगै साधारण सभा जेठको ७ र ८ गते काठमाडौंमा गर्ने तय भएको थियो। उक्त समयमा पनि लकडाउन जारी रहेको भन्दै महासंघले साधारण सभा साउनको २६ र २७ गतेका लागि तोकेको थियो।
सरकारले बुधबार लकडाउन अन्त्यको घोषणा गरे पनि स्कूल कलेज, सिनेमा हल, सभा सम्मेलन गर्न रोक लगाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
