काठमाडौं- अन्तर्राष्ट्रिय क्रिकेट परिषद (आइसिसी)ले अक्टोवर–नोभेम्बरमा हुने तय रहेको टी२० विश्वकप स्थगित भएको जनाएसँगै व्यस्त क्रिकेट तालिकामा केही समय निस्किएको छ। विश्वकप २०२१ या २०२२ मा हुने गरी नयाँ तालिका आउनेछ।
यसले कोरोना माहामारीका कारण रोकिएका ठूला प्रतियोगिताका लागि समय मिलाउन केही सहज हुनेछ। त्यसको सबैभन्दा बढी फाइदा इन्डियन प्रिमियर लिग (आइपिएल)लाई हुने देखिन्छ। भारतीय क्रिकेट बोर्ड (बिसिसिआई)ले यो सिजनको आइपिएल युएईमा गर्ने गरी छलफल गरिरहेको छ।
पहिले चैत १६ गतेदेखि गर्ने भनिएको प्रतियोगिता १८ दिन पछि सार्दै बैशाख ३ गतेका लागि नयाँ मिति तोकिएको थियो। तर कोरोना जोखिम बढ्दै जाँदा अर्को सूचना नभएसम्मका लागि स्थगित गर्ने निर्णय आएको थियो। अब युएईमा नै असोज १० देखि २१ गतेसम्ममा १३औँ सिजनको आइपिएल हुने गरी तयारी भइरहेको छ। विश्वकप स्थगितको सूचना पर्खेर बसिरहेको बिसिसिआइले अब आधिकारिक निर्णय गर्नेछ।
तर अहिले विश्वकप स्थगितपछिको महत्वपूर्ण समय आइपिएलले लिने हो भने विभिन्न देशका सिरिज भने प्रभावित हुनेछन्। यसैले कतिपय क्रिकेट समर्थकले विश्वकप स्थगितको निर्णय पनि बिसिसिआईबाट प्रभावित भएर आएको आरोप लगाइरहेका छन्। सोमबार लामो समय आइसिसी बोर्ड सदस्यको भिडियो बैठकमार्फत विश्वकप स्थगितको निर्णय आएको हो।
आइपिएल गभर्निङ काउन्सिलका अध्यक्ष ब्रिजेश पटेलले आइपिएल युएईमा गर्नेगरी भारतबाट अनुमति लिने तयारी भइरहेको बताएका छन्। ‘आउने हप्ताभित्र बैठक बसेर सबै निर्णय हुनेछ। युएइमा गर्ने गरी कुराकानी भइरहेको छ। त्यहाँको अवस्था र सुविधाहरु सबै हामीलाई थाहा छ’ उनले भने।
अहिले नयाँ तालिकामा भइरहेको तयारीमा भने ब्रोडकास्टर स्टार इन्डिया बेखुसी देखिएको छ। त्यही समयमा चाडबाडको बेला भएकाले क्रिकेट ब्रोडकास्टमा दर्शक कम हुने तर्क स्टार इन्डियाले गरिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791043321.png)
-1791041970.png)
-1786602170.png)
