काठमाडौं- प्रतिनिधि सभाअन्तर्गतको विकास तथा प्रविधि समितिले गुणस्तरहीन पुल निर्माण गर्नेहरुलाई मन्त्रालयले गरेको कारबाहीको विवरण पेश गर्न भौतिक पूर्वाधार तथा यातायात मन्त्रालयलाई निर्देशन दिएको छ। समितिको आइतबार बसेको बैठकले ७ दिनभित्र कारबाहीको विवरण पेश गर्न भनेको हो।
निर्माण सम्पन्न भएको काठमाडौंको टेकुस्थित विष्णुमति नदीको पुलमा प्राविधिक पक्ष एवं गुणस्तरमा कमजोरी भएको साथै निर्माणाधिन अवस्थामा रहेका काठमाडौंको तीनकुनेस्थित बागमती पुल निर्माणमा गडबडी भएको ठहर सरकारले गरेको थियो। त्यसैगरी हुलाकी राजमार्ग अन्तर्गतको बागमती पुल, रौतहटको टिकुलियाघाट र समनपुर पुल, कैलाली जिल्लामा पर्ने हुलाकी सडकअन्तर्गतको कान्जा पुल, धनगढी उपमहानगरपालिकाको मोहना पुल, सतिघाट पुल, डडेल्धुराको रंगुन पुललगायतका महत्वपूर्ण पुलहरुको निर्माणको कार्य तोकिएको समयमा गुणस्तरीय रुपमा सम्पन्न हुन नसकेको र प्राविधिक पक्षमा गम्भीर त्रुटी हुन गए देखिएको हो।
गुणस्तरहीन पुल निर्माण गर्नेलाई मन्त्रालयबाट के–कस्तो कारबाही गरियो भन्दै त्यसको विवरण सात दिनभित्र समितिमा उपलब्ध गराउन समितिले मन्त्रालयलाई निर्देशल दिएको हो। ती पुलहरुको निर्माण कार्यको सुनिश्चित हुने कार्ययोजना बनाई कार्यान्वयन गर्न साथै उक्त कार्ययोजना पन्ध्र दिनभित्र समितिमा उपलब्ध गराउन पनि समितिले मन्त्रालयलाई निर्देश दिएको छ।
समितिले आम नागरिकको दैनिक आवतजावत सहजीकरण गर्ने महत्वपूर्ण माध्यमको रुपमा रहेका देशभरका रणनीतिक सडकअन्तर्गतका पुराना एवं रुग्ण पुलहरुको अवस्था सम्बन्धी विवरण तयार गर्न भनेको छ। त्यस्ता पुलका लागि आवश्यक वित्तीय सुनिश्चितता सहित गुणस्तरीय रुपमा तोकिएको समयभित्र पुलहरुको कार्य योजनासहित शीघ्र निर्माण प्रक्रिया थाल्न मन्त्रालयलाई भनेको छ।
दक्ष प्राविधिक जनशक्ति अभावका कारण विकास र पूर्वाधारसँग सम्बद्ध आयोजनाहरुको काम समयमा गुणस्तरीय रुपमा सम्पन्न हुन नसकेको, कामको अनुगमन निरीक्षणमा बाधा परेको साथै अत्याधिक कामको चापले विकास निर्माणका कार्यहरु अवरुद्ध भइरहेको मन्त्रालयको भनाइ थियो। यस्तो अवस्थामा आवश्यक जनशक्ति परिपूर्ति हुने गरी मन्त्रालयको काम काजमा प्रभावकारीता ल्याउने वातावरण सुनिश्चित गर्न समितिले अर्थ मन्त्रालय र संघीय मामिला तथा सामान्य प्रशासन मन्त्रालयलाई निर्देश दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779770158.png)
-1764146706.png)
-1779545841.jpg)
