काठमाडौं-इन्डियन प्रिमियर लिग (आइपिएल ) क्रिकेट युनाइटेड अरब इमिरेट्स (यूएई) मा हुने सम्भावना बढेको छ। कोरोना भाइरस (कोभिड-१९) का कारण तहसनहस भएको खेलकुद जगत बिस्तारै उठ्दै गर्दा रोकिएका क्रिकेट सिरिजहरु सुरु हुन थालेका छन्। अब क्रिकेट लिगहरुलाई पनि बिस्तारै सञ्चालन गर्ने तयारीमा सबै जुटिरहेका छन्।
भारतीय क्रिकेट बोर्ड बिसिसीआई) ले कोरोनाका कारण रोकिएको आइपिएल सुरु गर्ने जमर्को कसिरहेको छ। शुक्रबारमात्रै बिसिसीआईको बैठकले कोरोनाको जोखिम अझै भारतमा नटरेको र यस्तो बेला प्रतियोगिता सञ्चालन गर्न नसकिने राय निकाल्दै २०२० को आइपिएल यूएईमा गर्न सबैभन्दा उत्तम विकल्प मानेको छ।
तर यूएईमै आइपिएल हुने फाइनल निर्णय भने भइसकेको छैन। बिसिसीआईका अनुसार सेप्टेम्बर र नोभेम्बरको बीचमा यूएईमा आइपिएल गर्ने बताइएको छ। कोरोना भाइरसका कारण अस्ट्रेलियामा हुने टि-२० विश्वकपको नयाँ मिति आइसिसीले सार्वजनिक गरिसकेको छ। अब विश्वकप क्रिकेट अक्टोबर १८ देखि नोभेम्बर १५ सम्म आयोजना हुनेछ। बिसिसीआईलाई आइसिसीले आइपिएल सञ्चालनबारे छलफल गर्न २० जुलाईमा बोलाएको थियो।
बिसिसीआईले भारत सरकारलाई पत्र पठाउँदै यूएईमा आइपिएल सञ्चालन गर्न अनुमति मागेकाे छ भने खेलाडी, अफिसियल र टिमको यात्राका पनि बन्दोबस्त मिलाउन अनुरोध गरेको छ।
भारतमा कोरोनाको संक्रमण अझै तीव्र गतिमा छ भने २६ हजार भन्दा बढीले ज्यान गुमाएका छन्।
यता, यूएई क्रिकेट बोर्डले पनि बिसिसीआईलाई पत्र पठाउँदै युएई आइपिएल का लागि वैकल्पिक भेन्यु भएको उल्लेख गरेको छ। यूएई क्रिकेट बोर्डले भनेको छ ‘आइपिएल आयोजना गर्न हामी तयार छौं यदी बिसिसीआईले हुन्छ भन्छ भने।’
आइपिएल सञ्चालन गर्न पूरै सहयोग गर्ने यूएई क्रिकेट बोर्डका सचिव मुबाश्शिर उस्मानी बताउँछन्। उनले भने, ‘यूएईमा आइपिएल गर्छ भने हामी पूर्णरुपमा साथ र सहयोग गर्छौ। सुरक्षादेखि सबैको बन्दोबस्त गर्छौ। हामी यहाँ आइपिएल गर्ने-नगर्ने भन्ने बिसिसीआईको पत्र कुरेर बसेका छौं।’
यदि आइपिएल लाई यूएईमा सञ्चालन गरिएमा दोस्रो पटक हुनेछ। यसअघि सन् २१४ मा भारतमा चुनाव हुँदा आइपिएलका २० खेल यूएईमा खेलाइएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
