काठमाडौं- सरकारले पर्यटन क्षेत्रलाई नखोले चरणबद्ध आन्दोलनमा जाने पर्यटन व्यवसायीहरुले बताएका छन्।
पर्यटन क्षेत्रबाहेकका सबै क्षेत्र खोलिसक्दा पनि पर्यटन क्षेत्रलाई बन्द गरिएको भन्दै विस्तारै खोल्ने नीति नलिए आगामी सातादेखि चरणबद्ध आन्दोलनमा जाने व्यवसायीहरुले बताएका हुन्। ‘टुरिजम अम्ब्रेला एसोसिएसन’ले बिहीबार काठमाडौंमा आयोजना गरेको पत्रकार सम्मेलनमा पर्यटन व्यवसायीहरुले सरकारले पर्यटन क्षेत्रलाई तत्काल खोल्न नचाहेको बताउँदै बिस्तारै खोल्ने नीति नलिए आन्दोलनमा जाने चेतावनी दिएका हुन्। नेपाल एशोसिएसन अफ टुर एण्ड ट्राभल एजेन्ट्सका अध्यक्ष अच्युत गुरागाईंले पर्यटन क्षेत्रलाई बिस्तारै खोल्दै जाने नीति नलिए आगामी सातादेखि चरणबद्ध आन्दोलनमा जाने बताए।
एयरलाइन्स अपरेटर एसोसिएसन अफ नेपालका अध्यक्ष क्याप्टेन रामेश्वर थापाले स्वास्थ्य सुरक्षाको सावधानीका उपायहरु अपनाएर आन्तरिक र बाह्य उडानलाई खोल्नुपर्ने बताए।
होटल संघ नेपालका उपाध्यक्ष विनायक शाहले एशिया प्रशान्त क्षेत्रका धेरै देशहरुले पर्यटन क्षेत्रलाई खोलिसकेको अवस्थामा नेपालले नखोले पछाडि पर्ने बताए। उनले कोभिड १९ समस्या तुरुन्तै समाधान नहुने भएकाले कोभिडसँगै जिउने गरी पर्यटन क्षेत्रलाई खोल्नुपर्ने बताए।
व्यवसायीहरुले हवाई सेवा समग्र पर्यटन गतिविधिको आधार भएकाले सन २०२० अगष्ट १ देखि आन्तरिक हवाई उडान र अगष्ट १५ देखि अन्तर्राष्ट्रिय उडान नियमित तालिकाअनुसार सुचारु गर्न माग गरेका छन्। त्यस्तै पर्यटकीय सवारी साधनहरु स्वास्थ्य सुरक्षासम्बन्धी उपायहरु पालना गरी निर्वाध रुपमा सञ्चालन गर्न दिन र पर्यटकीय क्षेत्र, गन्तव्य, सेवा तथा बजारीकरणका आधारहरु बिस्तारै सुचारु गर्न माग गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
