काठमाडौं- गत आर्थिक वर्ष २०७६/७७ को ११ महिना अवधिमा वार्षिक बिन्दुगत उपभोक्ता मुद्रास्फीति ४ दशमलव ५४ प्रतिशत रहेको छ।
नेपाल राष्ट्र बैंकले बिहीबार सार्वजनिक गरेको आर्थिक वर्ष २०७६/७७ को एघार महिनाको तथ्यांकमा आधारित देशको वर्तमान आर्थिक तथा वित्तीय स्थितिअनुसार मूल्यवृद्धि साढे ४ प्रतिशत कायम भएको देखिएको हो। सरकारले गत आर्थिक वर्षमा मूल्यवृद्धि ६ प्रतिशतभन्दा कम रहनेगरी नियन्त्रणमा राख्ने लक्ष्य लिएको थियो।
अघिल्लो वर्षको सोही अवधिमा यस्तो मुद्रास्फीति ६ दशमलव १६ प्रतिशत रहेको थियो। गत आर्थिक वर्षको वार्षिक औसत मुद्रास्फीति भने ६ दशमलव २८ प्रतिशत रहेको छ।
गत जेठ मसान्तसम्ममा खाद्य तथा पेय पदार्थ समूहको मुद्रास्फीति ५ दशमलव ४१ प्रतिशत र गैर-खाद्य तथा सेवा समूहको मुद्रास्फीति ३ दशमलव ८७ प्रतिशत रहेको छ। समीक्षा महिनामा खाद्य तथा पेय पदार्थ समूहअन्तर्गत दाल तथा गेडागुडी, सुर्तिजन्य वस्तु, मसला, अल्कोहलिक पेय पदार्थ र फलफूल उपसमूहको मूल्यवृद्धि उच्च रहेको छ।
त्यस्तै, काठमाडौं उपत्यकामा ४ दशमलव ४३ प्रतिशत, तराईमा ४ दशमलव ८६ प्रतिशत, पहाडमा ४ दशमलव १३ प्रतिशत र हिमालमा ४ दशमलव ३४ प्रतिशत मुद्रास्फीति रहेको तथ्यांक राष्ट्र बैंकले सार्वजनिक गरेको छ। २०७६ जेठमा यी क्षेत्रहरुमा क्रमशः ७ दशमलव १० प्रतिशत, ५ दशमलव ८० प्रतिशत, ५ दशमलव ७० प्रतिशत र ६ दशमलव ४६ प्रतिशत मुद्रास्फीति रहेको थियो।
२०७७ जेठसम्ममा वार्षिक बिन्दुगत थोक मुद्रास्फीति ३ दशमलव ९६ प्रतिशत रहेको राष्ट्र बैंकले जनाएको छ। अघिल्लो वर्षको सोही महिनामा यस्तो मुद्रास्फीति ५ दशमलव ३२ प्रतिशत रहेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
