काठमाडौं- संघीय सरकारले गत आर्थिक वर्ष २०७६/०७७ मा ४७ प्रतिशत पुँजीगत खर्च गरेको छ। महालेखा नियन्त्रक कार्यालयका अनुसार गत वर्ष १ खर्ब ९१ अर्ब ७६ करोड रूपैयाँ पुँजीगत खर्च भएको छ। सरकारले ४ खर्ब ८ अर्ब रूपैयाँ पुँजीगत खर्च गर्ने गरी बजेट ल्याएको थियो।
वर्षको सुरुदेखि नै सुस्त रहेको पुँजीगत खर्च चैतपछि झन् कमजोर भयो। कोरोना महामारीका कारण चैतपछि सरकारी खर्च नहुँदा यो वर्ष पुँजीगत खर्च निकै कम भएको हो।
महालेखा नियन्त्रक कार्यालयका अनुसार सरकारको कूल खर्च १० खर्ब ९४ अर्ब रूपैयाँ भएको छ। त्यसमा चालु खर्चको हिस्सा सबैभन्दा धेरै छ। गत वर्ष चालु खर्च ७ खर्ब ८६ अर्ब रूपैयाँ भएको महालेखा नियन्त्रक कार्यालयले जनाएको छ। वित्तीय व्यवस्थातर्फ १ खर्ब १६ अर्ब रूपैयाँ खर्च भएको कार्यालयले जनाएको छ।
राजस्वको लक्ष्य भेटियो, विवरण मिलेन
अर्थ मन्त्रालयले राजस्वको संशोधित लक्ष्य भेटिएको जनाएको छ। अर्थले ८ खर्ब २७ अर्ब रूपैयाँ राजस्व उठाउने सरकारको लक्ष्यअनुसार राजस्व संकलन भएको जनाएको छ। यद्यपि महालेखा नियन्त्रक कार्यालयको विवरणसँग भने यो मेल खाँदैन। महालेखाले गत आर्थिक वर्षमा ७ खर्ब ९३ अर्ब रूपैयाँ राजस्व संकलन भएको विवरण सार्वजनिक गरेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।