फाइल फोटो
काठमाडौं- गृहमन्त्री रामबहादुर थापा 'बादल'ले भारतका कारण नेपाली भूभाग डुबानमा पर्ने गरेको बताएका छन्। प्रतिनिधिसभाको राज्यव्यवस्था तथा सुशासन समितिको सोमबारको बैठकमा मन्त्री थापाले भारतीय पक्षले नेपालमा हस्तक्षेप गरेको बताए।
'बाह्य हस्तक्षेपको कारणले पनि डुबान भएको छ। भारतले सामान्तर बाँध, बाटो बनाउँदा डुबान हुने गरेको छ', उनले भने, 'भारतीय पक्षले नेपालमा हस्तक्षेप गरेको हो।'
उनले डुबान समस्या समाधानका लागि सरकारले पहल गरेको बताए।
भारतले बाटो, बाँध बनाएको ठाउँमा निकास दिनुपर्ने उनको भनाई छ। 'उनीहरुले आफ्नो रक्षाको निम्ति बाँध बनाए तर नेपालको राष्ट्रिय हितमा धक्का पुगेको छ', उनले भने, 'विगतमा भारतीय प्रधानमन्त्री आउँदा पनि टिम बनेर अध्ययन भएको छ तर त्यसलाई उनीहरुले कार्यान्वयन गरेनन्। उनीहरुले आफ्नो जिम्मेवारी सही ढंगले पूरा गरेका छैनन्।'
नेपालले प्राकृतिक विपद्को सामना हरेक समय गरिरहनु परेको बताउँदै गृहमन्त्री थापाले त्यसका निम्ति सरकारले आवश्यक कानुनी संरचना निर्माण गरेको बताए। 'जति कानुन बनाएका छौँ, त्यो अपर्याप्त हुनसक्छ', उनले भने, 'हाम्रा योजनालाई अझै वैज्ञानिक र वस्तुवादी बनाउँनु छ।'
उनले प्रकृतिको शक्तिलाई सदुपयोग गर्न नसक्दा र दुरुपयोग गर्दा क्षति व्यहोर्नुपरेको बताए। 'बाढी आउँछ अनि दाउरा निकाल्न गइन्छ। त्यो त बाढीको दोष होइन। हाम्रो अज्ञानता हो। विपद्बाट क्षति कम होस् भन्नका लागि सचेत बन्नुपर्छ। अव्यवस्थित बसोबास पनि क्षति हुनुको कारण हो।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791692981.webp)
-1787821303.jpg)
-1786602170.png)
