धनगढी- एनआरएन लघुवित्त वित्तीय संस्थाले किसान माइक्रोफाइनान्स र दिव्य लघुवित्त वित्तीय संस्थासँग मर्जर गरेर सोमबारदेखि एकीकृत कारोबार सुरु गरेको छ। एनआरएनले डेढ वर्षमै पाँच संस्थालाई मर्जर गरिसकेको छ। गत वर्षको भदौमा क्रियटिभ लघुवित्त र रामारोशन लुघवित्तलाई मर्जर गरेको थियो।
सोमबार मर्जर भएका किसान माइक्रोफाइनान्स २०६९ मा सञ्चालन भएको कैलालीको बलियामा केन्द्रीय कार्यालय रहेको लुघवित्त वित्तीय संस्था हो भने दिव्य राष्ट्रिय स्तरको लघुवित्त वित्तीय संस्था हो। एनआरएनका कार्यकारी निर्देशक इन्द्रकुमार शाहका अनुसार मर्जरपछि एनआरएनको लगानी चार अर्ब १० करोड, बचत ८७ करोड ६० लाख, सदस्य संख्या १ लाख ४४ हजार र ऋणी सदस्य संख्या ५० हजार ९ सय ९७, शाखा कार्यालयको संख्या १ सय ४२, कर्मचारी संख्या पाँच सय पुगेको छ।
४४ जिल्लामा शाखा विस्तार गरिसकेकोमा आगामी एक वर्षभित्र ७७ वटै जिल्लामा शाखा विस्तार गर्ने र हकप्रद सेयर र एफपीओ जारी गरी चुक्ता सेयर पुँजी एक अर्ब पुर्याउने योजना रहेको शाहले बताए।
एकीकृत कारोबार शुभारम्भ कार्यक्रममा सुदूरपश्चिम प्रदेशका आर्थिक मामिला तथा योजनामन्त्री झपट बोहराले अहिलेको लकडाउनको बेलामा नाफा कमाउनमा ध्यान नदिएर आफू बाच्न र ग्राहकलाई पनि बचाउन लघुवित्तले भूमिका खेल्नु पर्ने बताए। मन्त्री बोहराले कोरोना भाइरसका कारण शिथिल बनेको अर्थतन्त्रलाई चलायमान बनाउने गरी प्रदेश सरकारले काम गरिरहेको बताए।
प्रदेशमा आर्थिक गतिविधि बढाउन संघीय सरकारले बैंक वित्तीय संस्था खोल्न प्रदेश सरकारलाई पनि अनुमति दिनुपर्ने उनले बताए। मन्त्री बोहराले नेपालमा दीर्घकालीन र दिगो आर्थिक विकासका लागि पूर्वाधार विकास बैकिङ र विशेष बैकिङ प्रणाली सञ्चालनमा ल्याउन पहल भइरहेको बताए। यसका लागि नेपाल राष्ट्र बैंकका गभर्नरलाई पत्र पठाएको उनले जानकारी दिए।
एनआरएनका अध्यक्ष प्रमोद उप्रेतीले एनआरएनलाई राष्ट्रिय स्तरको लघुवित्त बनाउन मर्जर प्रक्रिया अघि बढाइएको बताए। किसान माइक्रोफाइनान्सका अध्यक्ष नेत्रप्रसाद जोशी लघुवित्तले आम जनताका बीचमा आर्थिक क्रियाकलाप वृद्धि गरिरहेको भएपनि डिजिटलाइज गरेर लैजान सरकारले नीतिगत सम्बाेधन गर्नु आवश्यक रहेको बताए।
एनआरएन लघुवित्त वित्तीय संस्था ग्रामीण सेवा नेपाल नामक गैर सहकारी संस्थालाई लिएर २०७५ चैत्रमा स्थापना भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
