सिन्धुपाल्चाेक- सिन्धुपाल्चाेककाे बाह्रबिसे नगरपालिकाको जम्बु र भोटेकोशी गाउँपालिकाको बुलकुटेमा बुधबार राति आएकाे बाढी-पहिराेमा परी बेपत्ता भएकाहरुमध्ये एक जना जीवितै फेला परेका छन्। अर्का एक जनाकाे शव भेटिएकाे छ।
जिल्ला प्रहरी कार्यालयका डिएसपी माधव काफ्लेले बाह्रबिसे बाढीमा बेपत्ता भएका ५७ वर्षीय नाप्चे मगर जीवित भेटिएकाे जानकारी दिए। शनिबार बिहान मगर भोटेकोशी नदीमा जीवित भेटिएका हुन्। उनको टाउको र खुट्टामा चोट लागेको र स्थानीय स्वास्थ्य संस्थामा उपचार भइरहेको डिएसपी काफ्लेले बताए।
त्यस्तै भोटेकोशी गाउँपालिका ५ बुलकुटेमा बेपत्ता भएका भोटेकोशी गाउँपालिकाका ६ वर्षीय साहिल तामाङ मृत भेटिएका छन्। शुक्रबार बेलुकी साहिलको शव चौतारा साँगचोकगढी नगरपालिकाको सुकुटेस्थित सुनकोशी नदीमा फेला परेको डिएसपी काफ्लेले बताए। शव परिवारजनलाई बुझाइएको छ।
जम्बु बाढीमा बेपत्ता भएकाहरुमध्ये २० वर्षीय निकेश बस्नेत र उनकी डेढ वर्षीया छोरीको शव यसअघि नै भेटिएको थियो। बाह्रबिसेमा बेपत्ता १७ जनाकाे खाेजी जारी छ। बुलकुटेमा बेपत्ता भएका तीन जना पनि अझै भेटिएका छैनन्।
जिल्ला प्रहरी कार्यालयका अनुसार खोजीमा विपद् व्यवस्थापन महाशाखाका २७ जना विशेष तालिम प्राप्त उद्धारकर्मी, नेपाली सेना, प्रहरी, स्थानीय, बेपत्ताका परिवारलगायत जुटेका छन्। काभ्रे, सिन्धुली, रामेछापका नदीमा खोजी गर्न प्रहरीले त्यहाँकाे प्रहरीलाई खबर गरेको डिएसपी काप्लले जनाकारी दिए। भोटेकोशी, सुनकोशीलगायतका नदीका आसपास क्षेत्रमा बसोबास गर्दै आएकालाई जिल्ला प्रहरी कार्यालयले सतर्कता अपनाउन र केही समस्या परे जिल्ला विपद् व्यवस्थापन समितिमा तुरुन्त खबर गर्न आग्रह गरेको छ।
बाढी-पहिराेका कारण विस्थापितलाई तातोपनी भन्सार कार्यालयमा राखिएको छ। भन्सार प्रमुख लालबहादुर खत्री, नेपाली सेना, सशस्त्र र नेपाल प्रहरीकोको सक्रियतामा करिब १ सय ५० जनालाई खान र बस्नको व्यवस्था गरिएकाे छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775812183.jpg)
-1764146706.png)
