काठमाडौं- अखिल नेपाल फुटबल संघ (एन्फा) ले नेपाली सेनाको मुख्यालय भद्रकालीमा रहेको खेलकुद मैदानमा बनाएको ‘चेन्जिङ रुम’ सेनालाई हस्तान्तरण गरेको छ। शुक्रबार एक कार्यक्रमबीच एन्फा अध्यक्ष कर्माछिरिङ शेर्पाले प्रधानसेनापति पूर्णचन्द्र थापालाई नयाँ निर्माण हस्तान्तरण गरे।
सेनाको जंगी अड्डा अगाडी रहेको मैदानको भिभिआइपी प्याराफिटमुनि रहेको दुई वटा खेलाडी चेन्जिङ रुम र रेफ्री चेन्जिङ रुमलाई एन्फाले सुविधासम्पन्न बनाएको हो। जसमा १५ लाख रुपैयाँ खर्च भएको एन्फाले जनाएको छ। यसका साथै मैदान सम्याउने काममा पनि एन्फाले सहयोग गरेको थियो।
विश्वकप छनोट लगायतका खेल नजिकिँदै गर्दा उक्त मैदानमा राष्ट्रिय टिमले तयारी गर्न सक्ने गरी स्तरोन्नती भएको एन्फाले जनाएको छ। यसैले विश्वकप छनोट लगायतका समयमा उक्त मैदानलाई एन्फाले प्रयोग गर्ने छ।
गएको चैतमा नै दशरथ रंगशालामा हुने तय रहेको विश्वकप छनोट अन्तर्गतका खेल कोरोना महामारीका कारण स्थगित भएको थियो। नेपालले आगामी असोजमा अष्ट्रेलिया, जोर्डन र चाईनिज ताईपेसँग घरेलु मैदानमा खेल्ने योजना छ। जसमा नेपाली र विदेशी टिमका लागि अभ्यासको छुट्टा छुट्टै मैदान आवश्यक पर्नेछ।
विश्वकप छनोटको समूह बी मा रहेको नेपालले आफ्ना सबै अवे खेल खेलिसकेको छ। घरेलु मैदानमा हुने एक खेल दशरथ रंगशाला तयार नहुँदा भुटानमा गएर खेलेको थियो।
छनोट अन्तर्गत नेपाल पहिलो लेगको खेलमा कुवेतसँग ७–० र दोस्रो लेगमा १–० ले पराजित भएको थियो। यस्तै, अष्ट्रेलियासँग ५–० र जोर्डनसँग ३–० ले पराजित भएको थियो। अवे खेल अन्तर्गत नेपालले चाइनिज ताइपेलाई २–० ले हराएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
